Read Angguruk Yali MAZMUR 109 Bible Online

MAZMUR 109 - Angguruk Yali bible

MAZMUR 109

¹Dauren sini milaltuk lit yunggultuk latfahon tu: Nikni Allah, Hat anden wel haptuk lahiyonen hele uk fug angge welam fug!

²Hat fahet ninirim peruk inaben enembilik iya reg lit an nabug uruk. Enele si ane uruk lit un ane lombohap naptuk.

³Alem nubam elegman an fahet enelmahip teg lit suwahal uruk.

⁴Anden it nindi isaruk lit unubahet sembahyang uruk latikik angge famen iren hebeloho an seliyap naptuk.

⁵Anden fano ane unubam turuk latikik angge famen iren hebeloho siyahap naptuk. An nundaman it fahet nindiyen peruk latikik angge famen iren hebeloho an nubahet inirim haruk.

⁶Ari fahet an men seli roho wereg ahun ino fam suwahal ukag ulug ap ubabut olokon eke monde fik watmihin!

⁷Unggum haloho emberuk ambehen alem hubam wereg ulug kong toho umbukag. Aren sembahyang urukon fahet Haren ele siyag toho uruk peruk laruhun.

⁸Hubulu uwan wilip am fugmu war aruhu. War atuk lit yabuk lin isahuwon ap winonen hilahureg wit taruk laruhu.

⁹Umalikisi suwarehon atukmu uhe oho yuwog welamag!

¹⁰Ibam halog toho siyahap turuk lit umalikisi yanggal enebuhupmu suburu heng enebil la wam turuk lamuhup.

¹¹Paleg angge fahet heng turukonen anggengge obog toho hilawag! Yabuk wituk lit yahal taruk laruhu angge obog toho ap aren haruk elehonen hirag taruk lamag!

¹²Ap misihen oho at indi reg laruhu fug. At war aruhumu umalikisi lin isahuwon arimano ap misihen oho let eneptuk lamuhup fug.

¹³Aren ondohowonen endebuhubon obog toho siyag amuhupmu ap fobik indag amuhubonen it ununuk enepeleg teg lamuhup.

¹⁴At umbasiyen siyag ane turuk latfahon fahet NINIKNI Allah apeleg aruhu fug. Allahn irim teg ane isingan turuk latisiyon oho eleg aruhu fug.

¹⁵It ununuk kinang tu famen eleg aruhu angge famen iren siyag ane turuk latfahon fahet NINIKNI Allahn wenggel harukmen eneg welaruhu.

¹⁶Hun ariyen ap inindi isa fug angge ap enenggengge elehen inilaheg toho wereg lit inindi anggin toho wenggel harukon mug eneplug laruk lit unusuruk latisi.

¹⁷Humali fahet indi reg latisi angge re hebeloho inggareg ubam amag. Allah unuk fam hi rurukon fahet nirim peruk latisi angge re aben ar oho Allah unuk fam hi ruruk lamuhup fug.

¹⁸Hun ariyen pamongge fahet indi anggen teg lit sum hag toho wan teg latisi angge re ik hag toho undama kuruk lit ebeyet uwahet siyahap tukag.

¹⁹Pamongge ino sum hag toho wan teg laruhumu pahaluk alunggu ke pug teg hag toho at ebe walinggoho het tegman eneg welaruhu.

²⁰NIKNI Allah, alem ari obog toho ap an siyahap nabul ulug suwahal uruk inap unubam umbuhun.

²¹Allah NIKNI, Haren humalikisi hindi enesug lit fano ane unubam turuk lahen. Ari fahet Hat hunuk siyag aruhu rohon an nibil atuk lit windat nabik watmihin.

²²An nine elehen nilaheg toho wereg lit nindimu ouk haruk lahi.

²³Mo ubuk urukmu ap enehuhe yat atuk lit folo-folo longgo uruk hag toho an oho folo-folo nine eleg atuk. Herenangge sum fam heriyegma aben sum ino elel harikim mako wamburuk hag toho an oho mako wambuk hag ane turuk lahi.

²⁴An suburu na fug angge weregman eneg nuyug ine eleg atisimu mulilik la mulilik wam turuk lahi. An nebe sei werehon eleg atisimu nuwag eneg welahi.

²⁵Iren an inda yako ninggaliyap naptuk. It an men salkal uruk lit yet niyalug inirimen unum hilik turuk.

²⁶Allah NIKNI, an nibil arik ma! Hindi nasug lit windat napmihin.

²⁷Ari roho turukmu yet hiyalusareg an fahet ninirim peruk inap arimano inindi anggar atuk lit IKNI Allah inggik ineyonen let tehek ulug onoluk atmisi.

²⁸Iren an huluwap naptuk angge famen Haren nineyap naptuk laruhun. Iren an siyahap nabul ulug in atuk angge famen it fobik mako wamburuk lit ininggali harukmu an hamingmingangge welahiyon nahiyeg toho welaruhuk.

²⁹An nubam suwahal uruk inap arimanowen ininggali haruk ane ari sum hag toho wan taruk lamag!

³⁰Anden nele hi roho NINIKNI Allah wel turuk laruhuk. Ap anggolo sehelimuwen At unuk palimuwap turuk laruhuk.

³¹Aren ap inine elehon iniraham unduhuk lit alem haloho emberuk inaben angginon unubam umbuhup tohon ulug ili og eneptuk.