Read Angguruk Yali MAZMUR 111 Bible Online

MAZMUR 111 - Angguruk Yali bible

MAZMUR 111

¹NINIKNI Allah wel turuk lamek! Allah umalikisi inindi pikit tehon palu roho weregma an nindi obog tohowen At fog turuk laruhuk.

²NINIKNI Allah inggik ineyonen su ane eke hag eke hag turuk. Ap san Allahn turukon fahet enehiyeg harukon arimanowen alem nungge fahet tirisi ulug fuki roho wenggel haruk.

³Ine roho turuk ane ariyen Allah mondabi palimuwon umbagpag turukon ino inam atuk. Allahn mun ane man ane haloho emberuk ane mondabi welaruhu.

⁴Aben tuk fug teg ane Anden turuk latik iyahon fahet enepeleg aruhu rohon ulug mo eke fam eke fam wenggel haruk lamuhup ulug Allahn nit komo nenepfag. NINIKNI Allahn nit fahet inilaheg peruk lit fanowap neneptuk.

⁵An men nininggik ahandip toho welamuhuk ulug sali imbibahon fahet wenggel haruk lit At fahet enekol toho wereg inap arimano suburu og isaruk.

⁶Numalikisiyen An nine fahet onoluk aruhu ulug ap o winamon enengginang og isibag.

⁷Fano ane siyag ane alem werehon hikit toho turuk lit pikir ane eneg turuk. Ele tem toho uruk lit ari-ari turuk lamuhup ulug komo nenepfag.

⁸Alem eke hag eke hag fahet komo nenepfahon arimano eleg am fug angge mondabi welaruhu. Komo nenepfag ane arimano hikit toho turuk lamuhuken tor angge oho apmayap tuk fug angge seneg lamuhuk.

⁹NINIKNI Allahn umalikisi windat enepfareg nininggik ahandip toho welamuhuk ulug sali imbibahon ino elehap tuk fug angge senegman eneg welaruhu. At unuk mondabi fanowon fahet ap enekol toho wereg.

¹⁰ NINIKNI Allah fahet enekol toho wereg ane ariyen eneg ap inindi anggar am teg. Allah fahet enekol harukon arimanowen alem eke hag eke hag fahet fuki roho wenggel haruk. Ari fahet NINIKNI Allah wel turukmen eneg welamuhup.