Read Angguruk Yali MAZMUR 112 Bible Online

MAZMUR 112 - Angguruk Yali bible

MAZMUR 112

¹NINIKNI Allah wel turuk lamek! Ap sa At fahet akol toho wereg lit Allahn umalikisi komo enepfahon fahet indi rehon ino ahiyeg toho welaruhu.

²Allahn ap inindi pikit tehon unumalikisiyet unumbusagsiyet inineyap eneptuken hun ariyen ondohowonen endebuhubon arimano kinang tu fam inine roho welamuhup.

³At anggengge anggolowen ibam keleg tegma aren pikir ane turukmen eneg welaruhu.

⁴Ap san Allahn fano perukon turuk lit ap inilaheg ulug inindi isaruk lit pikir ane eneg turukon o hik tegma wereg halug it unubam seleg aruhu.

⁵Ap san yabuk at hiyag utukon Allahn fano peruk ane hikit toho wituk lit ap enenggengge elehon fahet inilaheg ulug indiyen nungge-nungge og isarukon ino fano welaruhu.

⁶At akolen yuk tuk fug angge weregman eneg welaruhu. Aren pikir ane turukon fahet ap enepeleg am fug angge wenggel harukmen eneg welamuhup.

⁷Indi wirik toho NINIKNI Allah ubam wenggel haruk lit wene siyahon hiyag utukon fahet akol haruk laruhu fug.

⁸Undaman wenggel haruk lit an men seli roho werehon arimano fobik mako wamburukmu an nilen yet isahuk ulug indi wirik toho wenggel halug nungge-nungge fahet akol haruk eleg.

⁹Inggik pisila roho wereg lit enenggengge elehon og isaruk. Fano ane turukon ari mondabi welaruhu. At ino ine anggolo aruhumu aben unuk wel turuk lamuhup.

¹⁰Ari roho turukmu ap onolokonen yet hahupteg inindi siyahen eneyeg kilit matuk lit weregman eneg siyag amuhup. Siyag atukmu iren tila perukon oho eleg aruhu.