Read Angguruk Yali MAZMUR 116 Bible Online

MAZMUR 116 - Angguruk Yali bible

MAZMUR 116

¹Anden let nabin ulug nele ine roho heng turukmu NINIKNI Allahn holtisimu At fahet nindi roho welahi.

²Anden likiya hupmu nele hi roho urukmu Aren holtuk.

³Hele war atuk aheleyen walinggoho pug nasugmu ap warehon wereg ambeg lamin ano ulug nakolen nahap homhombuk turuk latikik.

⁴NIKNI Allah fam nele uruk lit, ”NIKNI, an windat nabin,” ulug heng tirikik.

⁵NINIKNI Allah ubabut fanowon inowen ap indi enesug lit inilaheg ulug let eneptuk.

⁶Ap ininggik hila fug angge werehon Aren wanggi wat enesug. An nine eleg toho weregma Aren let naptisi.

⁷NINIKNI Allahn fano ane nubam tirisimu nindi yuwag toho welahi.

⁸NINIKNI Allahn mako wambuhu rohon ulug ninggik sen naptuk lit ap war atuk ambehen windat naptisireg uba yatukmu yonggon naptisi.

⁹An war ale angge famen ap onoluk werehon enesehelimu wereg lit NINIKNI Allah alukema laruk lahi.

¹⁰An nindi anggin anggolo welahi irikik angge famen Nikni Allah fam eneg wenggel haruk latikik.

¹¹Nindi angginen nonghong uruk lit ap obog tohowen lal naptuk irikik.

¹²NIKNI Allahn fano ane nubam tirisiyon fahet nungge ayeg waroho At og uruhuk?

¹³Allah umalikisi onolohotman NIKNI Allahn windat naptisi uruk lit anggur ahaluwe Allah alukema imbik waruhuk.

¹⁴Anden Allah fam sali irikikon hikit toho At umalikisi palu roho wereg ambehen At wel tuhuk.

¹⁵NINIKNI Allahn ap nindi enesug lahiyon onoluk wereg ane palimu rehen war atukon fahet nirim ulug inggik kobog isaruk eleg.

¹⁶NIKNI Allah, an nisinga Hat hamingmingangge welatisi hag toho an oho Hat hamingmingangge werehen Haren ap warehon wereg ambehen windat naptikin.

¹⁷Ari fahet Hat holohotma hubu lahaptuk lit hunuk suwap tuhuk.

¹⁸Hat humalikisi hibam o pumbuk Yerusalem pulmu werehon iraham palu roho weregma Anden sali hubam irikikon hikit toho Hat wel habuhuk. Hiren oho NINIKNI Allah wel turuk lamek!