Read Angguruk Yali MAZMUR 118 Bible Online

MAZMUR 118 - Angguruk Yali bible

MAZMUR 118

¹ NINIKNI Allah ubabut fanowon inowen indi nenesug lit eneg werehen At wel turuk lamek!

²Hit Israel hinaben henele uruk lit, ”Aren indi nenesug lit eneg wereg,” uruk lamuhup!

³Hit Allah amingmingangge imam welahebonen henele uruk lit, ”Aren indi nenesug lit eneg wereg,” uruk lamuhup!

⁴Hit obog toho Allah fahet henekol toho welahebonen henele uruk lit, ”Aren indi nenesug lit eneg wereg,” uruk lamuhup!

⁵An asengseng toho wereg lit nele urukmu NIKNI Allahn hol harisireg windat naptisi.

⁶At nibil atukmu ap misihen oho nungge-nungge nubam tuk fug tehen nakol eleg toho welahi.

⁷NIKNI Allah an niraham wereg lit let naptukmu an fahet inirim peruk inap mako wamburukmu nilen yet isahuk.

⁸Aben let nenebusa ulug wenggel ha fug angge Allahn eneg windat nenepmisi ulug At alukema laruk lamuhup.

⁹Ap inine werehonen let nenebuhup ulug wenggel ha fug angge Allahn eneg windat nenebuhu ulug At olohotma welamuhup.

¹⁰Ap seliyon anggolowen an waling naptuk latusa angge famen anden NINIKNI Allah unuk fam yanggal eneptuk latikik.

¹¹Ap o kema-kema werehonen an nuwabul ulug huk naptuk latusa angge famen anden NINIKNI Allah unuk fam apmayap eneptuk latikik.

¹²Kin amiyen e fam hililip turuk hag toho an hililip naptuk latusa angge famen anden NINIKNI Allah unuk fam yanggal eneptuk latikik. Hoholangge fam indok ambulpul turukon folo-folo war atuk hag toho ir oho folo-folo linggik-longgo urusa.

¹³Mako wambimisi ulug inine roho miyal naptusa angge famen NIKNI Allahn let naptisi.

¹⁴ NIKNI Allahn ine an og nutuk lit windat naptisi ulug sini fam wel turuk lahi.

¹⁵Allah umalikisi inibam o sabo wal taneg wereg lit NINIKNI Allah ine werehon inowen ninibil ahama palimu ahe ulug enehiyeg toho sini yunggultukon holeg lamek!

¹⁶”NINIKNI Allahn inggik ineyon leg haruk lit ap seliyon apmayap enebehek,” uruk.

¹⁷An war ale angge famen noluk wereg lit NIKNI Allahn nubam turuk latisi ane ap hiyag isaruk laruhuk.

¹⁸NIKNI Allahn ine roho siyahap naptisi angge famen mondabi ap war atuk ambeg hik niyarisi fug.

¹⁹Allah ibam kurukon sok ino hut naplihipmu kiminteg At wel timin.

²⁰Allahn peruk ane turuk inap eneg sok ino fam kuk teg.

²¹Anden sembahyang hubam irikikmu Haren holtikinteg let naptikinmu palimu atikik ulug Hat wel haptuk lahi.

²²O wituk inaben helep tu siyag ulug hik isaruson ino ubule yag atisi.

²³NINIKNI Allahn nit nonolohotman alem ari turuk lit aben tuk fug teg ane turuk latisi.

²⁴O yoho tu NINIKNI Allahn perisi ane roho sakan tehekma nenehiyeg toho wereg lit sini yunggultuk lamul.

²⁵NINIKNI Allah, Haren let neneptuk lit palimuwap nenebuhun!

²⁶Ap sa NINIKNI Allah unuk fam waharukon Allahn indi reg laruhu. Nit Allah ibam foroho laheyonen At unuk fam hi heneptuk lahe.

²⁷Nit NINIKNI Allah misig eneg wereg lit seleg fanowon og nisaruk. E inggila fam kaya ril king toho laruk lit NINIKNI Allah fahet hubu lahaptuk ambeg walingguruk lamek!

²⁸Hat eneg Nikni Allah welahenma anden wel haptuk lit hunuk palimuwap turuk lahi.

²⁹NINIKNI Allah ubabut fanowon inowen indi nenesug lit eneg werehen At wel turuk lamek!