Read Angguruk Yali MAZMUR 119 Bible Online

MAZMUR 119 - Angguruk Yali bible

MAZMUR 119

¹[17] Ap san NINIKNI Allahn tu men ari men turuk lamuhup ulug kong toho imbibahon hikit toho turuk lit siyag ane turuk elehon arimano enehiyeg toho welamuhup.

²Ap san Allahn komo nenepfag ane seneg lit inindi piren teg eleg angge At yami rurukon arimano enehiyeg toho welamuhup.

³Iren onolok ane tuk fug angge kebunggalem Allahn hiyag isaruk ke laruk.

⁴NINIKNI Allah, Haren tuk teg ane fahet kong toho imbinahon inine roho seneg lamag ulug nit og nisinag.

⁵Haren hili imbinahon hikit toho kebunggalem pikiron eneg laruk laruhuk ulug nindi ouk toho wenggel haruk lahi.

⁶Humalikisi komo eneptuk ane Haren hiyag isinahon obog toho anden fuki roho wenggel haruk laruhuk halug ninggali eleg toho welaruhuk.

⁷Haren pikir ane kong toho imbinahon fahet milal taruk lit nindi fanowon inowen Hat wel haptuk laruhuk.

⁸Haren hili imbinahon hikit toho turuk laruhukmu an numbaharuk laruhun fug.

⁹Ap kabiniyon ekeyen alem siyahon nubam aruhu rohon ulug nanggintuk laruhu? Aren Hat hele holtuk lit fano welaruhu.

¹⁰Anden nindi piren teg eleg angge Hat yami haptuk lahireg humalikisi komo eneptuk ane Haren hiyag isinahon suhan isahuk tohon an fet nasug laruhun.

¹¹Anden Hat hele ying hapmin fug ulug hele inahon nindimu foroho lahi.

¹²NIKNI Allah, anden Hat wel haptuk lahi. Haren hili angge imbinahon arimano an milal nabin!

¹³Hat hambiliken pikir ane fahet hiyag nisinahon arimano obog toho anden wal taneg uruk lahi.

¹⁴Mun angge man angge anden tohon fahet nahiyeg haruk lahi hag toho Hat humalikisi komo eneptuk lahen ane fahet oho nindi nahiyeg toho holtuk lahi.

¹⁵Haren tuk teg ane fahet kong toho imbinahon an nindimu wenggel haruk lit Haren kalem pikiron hiyag nisaruk lahen ke laruk laruhuken yet teg laruhuk.

¹⁶Haren hili imbinahon arimanowen an nindi nahiyehap naptukmu Hat hele inahon napeleg aruhu fug.

¹⁷Haren an hamingmingangge nubam fano ane turuk laruhunmu an fano noluk wereg lit Hat hele inahon senegman eneg welaruhuk.

¹⁸Humalikisi komo eneptik inag ane suwesingga fam haharehon ino anden winag haruk lit fano ane aben wenggeluk fug tehon undama werehon kim haminen nil selehap nabin.

¹⁹An ap pohon hag toho wereg lit kinang tu fam ilamna roho eneg welahireg humalikisiyen tuk teg ane fahet hiyag isinahon anden oho holuhuken an nolohotman hirahuk fug.

²⁰Haren pikir ane fahet kong toho emberuk lahenon noluk amag ulug likiya hupmu nindi ouk toho wenggel haruk lahi.

²¹Inindimu winik-wonog angge rurukon arimano Haren pet eneptuk lahen. Iren Hat humalikisi komo eneptik inag ane sobir isalug kalem hareyon laruken siyag amag!

²²Komo Haren nit hiyag nisaruk lahenon ari anden holtuk lahi. Holtuk lahiyon fahet ap arimanowen inda yako ninggaliyap naptuk ane ino an nubam tag tehen Haren oko wamihinteg oko elehap tin.

²³Ap suwon-suwon arimanowen an siyahap nabul ulug enele sahaltuk angge famen an Hat hamingminganggeyen hili angge Haren kong toho imbinahon fahet wenggel haruk ane umbusuhuk fug.

²⁴Komo humalikisi hiyag isarik inag ane ariyen an fano komo naptuk lit nindi nahiyehap naptuk.

²⁵An nindi fir atisimu kinangma yinggig lahireg Haren sali emberikinon hikit toho nineyap napmihinmu nin hebeloho fano noluk welaruhuk.

²⁶Mun ane man ane anden turuk latikikon Hat hiyag hitikikmu Haren hebeloho hele hiyag nitikin. Ketiya Haren hili imbinahon fahet milal napmihin.

²⁷Humalikisiyen tuk teg ane fahet kong toho imbinahon fahet nindi anggar atmisiyen nineyap napmihinmu aben uk fug teg ane Haren hiyag nisaruk lahenon fahet nindimu wenggel haruk laruhuk.

²⁸An nindi angginen uba longgon kil-kal uruk lahireg Haren sali emberikinon hikit toho yonggon naptuk lit hebeloho unduhuk nubahamihin.

²⁹Un ke lahuk tohon an hindi nasug lit tuk teg ane fahet kong toho imbinag ane roho milal napmihin.

³⁰Allah ele eneg holtuk laruhuk ulug kong toho emberikikteg Haren pikir ane fahet kong toho imbinahon an nalukema emberuk lahi.

³¹NIKNI Allah, Haren humalikisi komo eneptik inahon anden nine roho seneg lahi. Ari fahet aben an ninggaliyap nabuhup tohon an fet nasug laruhun.

³²Haren an nindi anggarap naptikinmu komo humalikisi hiyag isinahon hikit toho kalem fanowon eneg laruk laruhuk.

³³NIKNI Allah, Haren hili angge imbinahon arimano hikit toho turuk laruhuken milal naptuk laruhun. Milal naptuk laruhun ane ari anden mondabi senegman eneg welaruhuk.

³⁴Haren an nindi anggarap naptukmu nindi piren teg eleg angge Haren tu men ari men turuk lamuhup ulug kong toho imbinahon seneg laruhuk.

³⁵Haren komo neneptuk lahen ane fahet nahiyeg haruk lahi. Ari fahet Haren fano peruk lahenon hikit toho turuk laruhuken nineyap naptuk laruhun.

³⁶An ninggikmu anggolo welalep perukon ari siyag, Haren humalikisi komo eneptuk lahenon ari fano peruk laruhuken an nindi og nabin.

³⁷Nungge-nungge alem elehon nilen yet hahuk tohon an fet nasug lit fano noluk welaruhuken kalem fanowon hiyag nimin.

³⁸Haren sali emberikinon hikit toho an nubam turuk laruhunmu aben yet hiyalug Hat fahet enekol toho welamuhup.

³⁹Haren pikir ane fahet kong toho imbinahon fano wereg peruk lahi. Ari peruk lahiyon fahet aben inda yag naptukmu nakol haruk lahi. Iren an ninggaliyap nabuhup tohon Haren sen enebin.

⁴⁰Haren tuk teg ane fahet kong toho imbinahon hikit toho turuk laruhuk ulug nasehet toho wenggel haruk lahi. Ari fahet Hat pikir ane eneg turuk lahenonen an fano noluk welaruhuken nineyap napmihin.

⁴¹NIKNI Allah, an hindi nasug lit Haren sali emberikinon hikit toho ili og nabik watmihin.

⁴²Ili og nabik watmihinmu an nubahet hun aruwen Allah ele holtuk ulug ninggaliyap naptuk inap unubam nambong se roho nele imin.

⁴³Haren kong toho emberuk lahenon ariyen mun ane man ane fano aruhu peruk lahi. Ari fahet an nambilik laroho wereg lit Allahn ele tem toho uruk ulug hiyag isa fug teg laruhuk tohon numbahuk fug.

⁴⁴Haren ari-ari turuk lamuhup ulug komo neneptik inahon anden mondabi senegman eneg welaruhuk.

⁴⁵Haren tuk teg ane fahet inahon hikit toho turuk ane wal haruk lit kalem fano yaho ke laruk lahi.

⁴⁶An ninggali ha fug angge Haren komo neneptuk lahenon fahet ap suwon hiyag isaruk laruhuk.

⁴⁷Humalikisi komo eneptuk ane Haren hiyag isinahon fahet nindi anggen teg lit nahiyeg haruk lahi.

⁴⁸Haren komo eneptuk lahen ane ari we tem toho nindi reg lit palimuwap turuk lahi. Hili imbinahon arimano fahet anden fuki roho wenggel haruk lahi.

⁴⁹Allahn an nubam sali irisi ane nosambil hikirap tuhu ulug yet teg lahireg Nikni Allah, Haren an hamingmingangge nubam irikinon fahet hapeleg aruhu fug!

⁵⁰Haren an nubam hele uruk lit nineyap naptukmu fano noluk welahi. An asengseng toho wereg li Hat hele uruk lahenon fahet wenggel haruk lit nindi yuwag atuk.

⁵¹Enele hemet toho uruk inaben an inda yako ninggaliyap naptuk angge famen Haren ari-ari turuk lamuhup ulug komo neneptik inahon anden suhan isaruk lahi fug.

⁵²Hat NIKNI Allahn indamen tulug ketiya oho pikir ane kong toho emberuk lahenon fahet wenggel haruk lit an nindi se atuk.

⁵³Hat fahet ninirim peruk inaben Haren tuk teg ane fahet kong toho imbinahon embeserukmu yet isalug an nundama ahe laharuk.

⁵⁴An kinang tu fam ap pohon hag toho wereg lit Haren hili imbinahon arimano fahet sini yunggultuk lahi.

⁵⁵Hubanggo anden Hat NIKNI Allah hunuk fahet ebet haruk lit Haren komo nenepfahon senegman eneg welaruhuk peruk lahi.

⁵⁶Haren tuk teg ane fahet imbinahon foroho ane an nubam wereg ulug nahiyeg haruk lahi.

⁵⁷An nanggengge mondabi elegma Hat NINIKNI Allahn an naseher angge og nutuk lahenma Hat hele eneg holtuk laruhuk ulug sali irikik.

⁵⁸Haren sali irikin ane hikit toho hindi niyamihin ulug an nindi obog tohowen hubam heng haptuk lahi.

⁵⁹Anden eke hag eke hag turuk latikikon fahet wenggel harikikteg Haren komo neneptuk lahen ane hebeloho holtuk lit kalem fanowon eneg laruk laruhuk peruk lahi.

⁶⁰Haren hiyag nutuk laruhunon anden hol halug musun tuk fug angge folo-folo turuk laruhuk.

⁶¹Hat fahet ninirim peruk inaben an hele fam nuwatuk angge famen Haren komo neneptik inag ane an napeleg aruhu fug.

⁶²Hup humanoho an in atuk lit Haren pikir ane kong toho imbinahon fahet wel haptuk lahi.

⁶³Ap san Hat fahet enekol toho wereg lit Haren tuk teg ane fahet kong toho imbinahon seneg inap arimano anden nori ulug nindi enesug lahi.

⁶⁴NIKNI Allah, Haren hindi enesug lahen ane ariyen kinang atogman atogma keleg teg. Haren hili imbinahon fahet an milal naptuk laruhun.

⁶⁵NIKNI Allah, Haren sali emberikinon hikit toho an hamingmingangge nubam fano ane turuk latikin.

⁶⁶Haren an fano komo naptuk peruk lahireg an nindi anggarap naptuk lit fanowon tu, siyahon tu ulug haloho emberuk ane milal napmihinen heng haptuk lahi.

⁶⁷Anden indam angge Hat hele holuk fug angge weregman eneg alem angginon nubam atisimu ketiya Hat hele holtuk lahi.

⁶⁸Hat hubabut fanowonen fano ane eneg turuk lahen. Ari fahet Haren hili imbinahon fahet an milal naptuk laruhun.

⁶⁹Enele hemet toho uruk inaben enele si ane uruk lit un ane nubam lombohap naptuk angge famen anden nindi piren teg eleg angge Haren tuk teg ane fahet kong toho imbinahon eneg seneg lahi.

⁷⁰Ap arimano inindi sohu roho wereg angge famen komo Haren hiyag nisinahon fahet an nahiyeg haruk lahi.

⁷¹Alem angginon fano nubam atisi. Alem ariyen Haren hili imbinahon arimano milal taruk ane ak tirikik.

⁷²Haren humalikisi komo eneptuk lahen ane ari fahet anden fano anggolo peruk lahireg umbagpag turuk angge emas perak teng-teng angge men wirim teg eleg.

⁷³Hat hinggiken an laloho werehap naptik inag. Haren an nindi anggarap naptukmu humalikisi fano welamuhup ulug komo eneptik inag ane milal taruk laruhuk.

⁷⁴Haren sali uruk lahenon hikit toho an nubam turuk laruhun ulug nangno hasug lahi. Nangno hasug lahiyon yet niyaruk lit ap Hat hubam wenggel harukonen enehiyeg haruk lamuhup.

⁷⁵NIKNI Allah, Haren unggum fano haloho emberuk lahenon an noluk teg. An nubam oho alem angginon fano emberikin.

⁷⁶An hamingmingangge nubam sali emberikinon hikit toho numbahuk fug angge hindi nasug laruhunmu nindi se aruhu.

⁷⁷Haren tu men ari men turuk lamuhup ulug kong toho imbinahon nindi pulmu reg lahi. Haren an hindi niyaruk laruhunmu fano noluk welaruhuk.

⁷⁸Enele hemet toho uruk inaben un ane nubam lombohap naptuken ininggali haruk lamag! Anden pikir ane Haren hiyag nisaruk lahenon fahet wenggel haruk laruhuk.

⁷⁹Ap hat hubam wenggel haruk lit Haren komo neneptik inag ane onolukon arimano an nibil amag.

⁸⁰An ninggali hahuk tohon nindi piren teg eleg angge Haren tuk teg ane fahet imbinahon hikit toho turuk laruhuk.

⁸¹Haren an fanowap nabuhun ulug nindi ouk toho wenggel haruk lahi. Allahn sali irisiyon we tem toho hikirap tuhu ulug nangno reg lahi.

⁸²Haren irikinon hikit toho an let nabik waharukmu nilen yet hahuk ulug nangno regman eneg nine eleg atuk. Noenam welaruhukmu Haren nindi seyap nabik waruhun?

⁸³An nine elehen sum miningon tararag turukon hag toho welahi angge famen Haren tuk teg ane fahet kong toho imbinahon napeleg atuk eleg.

⁸⁴An hamingmingangge hup noenam welaruhukmu Haren ap mug naplug waharukon arimano alem unubam umbuhun?

⁸⁵Enele hemet toho uruk inap arimanowen Haren ari-ari turuk lamuhup ulug kong toho imbinahon windal isaruk lit an sen nabul ulug kinang habuloho yebangge yep teberuk.

⁸⁶Haren tu men ari men turuk lamuhup ulug humalikisi hiyag isaruk lahenon arimano alem werehen hele tem toho uruk lahen angge famen an nubam alem elegman aben mug naplug waharuk. Waharukmu windat nabik ma!

⁸⁷Anden Hat hele embeserikik fug angge famen aben an nuwabuk oho turuk.

⁸⁸An noluk welaruhuken Haren hindi nasug lit nineyap naptuk laruhunmu Haren komo neneptuk lahenon senegman eneg welaruhuk.

⁸⁹NIKNI Allah, Hat hawene poholma weregman eneg mondabi welaruhu.

⁹⁰Haren kinang ahongge yaho finagma amusun toho wereg. Aben endebuhubonen endebuhubon arimanowen endetil larukmu Hat hindi enesugmen eneg welaruhun.

⁹¹Mun angge man angge kinangma werehon Hat hamingmingangge roho wereg. Haren hili angge imbinahon arimano hikit toho turuken eleg am fug angge ketiya oho wereg.

⁹²Haren komo neneptik inahon ariyen an nindi nahiyehap naplep fug halug an asengseng toho weregman eneg war ale.

⁹³Haren tuk teg ane fahet kong toho imbinahon ariyen an nineyap naptikinmu noluk welahi. Ari fahet Haren kong toho imbinahon arimano napeleg am fug angge senegman eneg welaruhuk.

⁹⁴An hanggengge wereg lit Hat hele holtuk laruhuk ulug yami ruruk lahi angge re windat nabik ma!

⁹⁵Hat fahet ninirim peruk inaben an nuwabul ulug kahal nasug angge famen komo Haren hiyag nisinahon anden embeseruk lahi fug.

⁹⁶Anden yet harukmen mun angge man angge werehon fobik eleg aruhu angge famen humalikisi komo eneptuk ane Haren hiyag isinahon amusun toho welaruhu.

⁹⁷Ari-ari turuk lamuhup ulug Haren kong toho imbinahon arimano anden nindi reg lahi. Huber angge ak tebelug wenggel harukmen eneg o hup atuk.

⁹⁸Hat hele uruk lahen ane mondabi an nubam wereg lit nindi anggarap naptukmu ap an men seli roho werehonen wenggeltuk ane ambi reg eleg.

⁹⁹Hat hele emberuk lahen ane Anden kim haruk lit wenggeltuk lahi ane mondabi palimu rehen an milal naptuk inaben peruk ane men wirim teg eleg.

¹⁰⁰Haren kong toho imbinahon anden seneg lit nindi anggat teg lahi ane anggolo regma niknisi sabalonen inindimu onoluk teg ane we tot teg.

¹⁰¹Nikni ele pisan isamin fug ulug ke hareyon la fug angge nolok ane turuk lahi fug.

¹⁰²Haren humalikisi komo eneptuk lit imbinahon hinggarehen milal naptuk lahenma anden hondo rebeseruk lahi fug.

¹⁰³Kin ahaluwe unduk fano angge famen Haren uruk lahen ane mondabi fano reg lit wereg.

¹⁰⁴Haren hili imbinahon famen nindi anggar atukmu kalem hareyon larukon fahet nirim peruk lahi.

¹⁰⁵Hat hele ino iral hag toho wereg lit an lamin peruk ke selehap turuk.

¹⁰⁶Haren pikir ane fahet kong toho imbinahon anden seneg laruhuk ulug sali emberikikon hikit toho turuk laruhuk.

¹⁰⁷NIKNI, an asengseng anggolo roho welahireg Haren sali imbinahon hikit toho fet nasug lamin!

¹⁰⁸NIKNI, Haren let nabehen ulug nele hubam uruk lahiyon fahet hahiyeg toho wereg lit Haren peruk lahen ane milal naptuk lamin!

¹⁰⁹Likiya hupmu war atuk ane nubam am hag teg angge famen Hat hele emberikin ane fahet napeleg atuk eleg.

¹¹⁰Onolok ane turuk inap arimanowen an yebangge elma kukag ulug sap teberuk angge famen Haren kalem pikiron laruk lamuhup inag ane embeseruk lahi fug.

¹¹¹Humalikisi komo eneptuk ane Haren hiyag isinahon arimano anden mondabi ngi reg lit nindi nahiyeg toho welahi.

¹¹²Haren hili angge imbinahon apma weregman eneg nil eleg aruhu.

¹¹³Inindi piren tehon fahet nirim, Haren tuk teg ane fahet imbinahon nindi.

¹¹⁴Hat tog piyabangge hag toho weregma an hapma hirag arik laruk lahi. Haren sali irikinon hikit toho nubam turuk laruhun ulug nangno hasug lahi.

¹¹⁵An Nikni Allahn umalikisi komo enepfag ane seneg lahireg hit honolok ane turuk lahebon numbahalug aliyek!

¹¹⁶Nikni Allah, Haren sali irikin ane hikit toho an noluk welaruhuken ninggik sen nasug laruhun. Allahn let naptuk laruhu ulug Hat yet hasug lahiyon ninggali hahuk tohon!

¹¹⁷An let naptuk lit timimu unduhuk nubahamihin. Unduhuk nubahamihinmu Haren tuk teg ane fahet kong toho imbinahon senegman eneg welaruhuk.

¹¹⁸Haren hili imbinahon suhan isaruk inap arimano obog toho hambol yig isaruk lahen. Enele si ane uruk lit til norukon saplangge turuk.

¹¹⁹Hat fahet ninirim peruk inap arimano obog toho sahongge eneko hik isarukon hag toho kinang tu famen hik isaruk lahen. Ari fahet Haren komo neneptuk lahen ane arimano anden nindi reg lahi.

¹²⁰Haren alem haloho emberukmu yet hiyalug an nakolen nuwag elek turuk lahi.

¹²¹Anden pikir ane eneg turuk lit ap let eneptuk latikik angge re Haren an nele ying naptuk inap ininggikmu numbahuk fug!

¹²²Enele hemet toho uruk inaben an nele ying nabuhup tohon Haren an hamingmingangge ili og nabin.

¹²³Haren sali emberikin ane hikit toho alem an nubam lombohap naptuson haloho emberuk lit windat naptukmu nilen yet hiyahuk ulug nangno hasugmen eneg nine eleg atuk.

¹²⁴An hamingmingangge hindi nasug lit hili imbinahon fahet milal nabin.

¹²⁵An Hat hamingmingangge welahireg Haren komo neneptik inahon fahet fuki roho wenggel haruk laruhuken nindi anggarap nabin.

¹²⁶NIKNI Allah, Haren tu men ari men turuk lamuhup ulug komo eneptik inahon aben apmayap turuken Haren alem haloho umbuhunon horog teg.

¹²⁷Ari fahet umbagpag turuk angge emas orohole fanowon fahet nirim, Hat hele komo neneptuk lahenon eneg nindi.

¹²⁸Ari fahet Haren tuk teg ane kong toho imbinahon arimano obog toho seneg lit kalem pikiron eneg laruk lahi. Un ke larukon fahet nirim.

¹²⁹Hat hele fano ane eneg uruk lit aben wenggeltuk eleg ane hiyag isaruk lahenon anden nine roho seneg lahi.

¹³⁰Haren uruk ane aben seleg toho milal eneptuk halug it inindi seleg atuk. It winon inindi sohu roho werehon oho anggar atuk.

¹³¹Ik oboken inindi ahe laharuk hag toho Haren komo napmisi ulug nindi ouk toho wenggel haruk lahi.

¹³²Ap Hat hubahet inindi hasuhon arimano Haren hindi enesug lahen hag toho an oho Hat halukema numbaharuk lit hindi nasug laruhun.

¹³³An ke hareyon laruk lit nolok ane tuhuk tohon Haren hili imbinahon ino feneyen nindi wirikap naptuk laruhun.

¹³⁴Aben an apmayap naptukon ininggikmuwen Haren windat nabuhunmu Haren humalikisi fam tu hag toho turuk lamuhup ulug hiyag isinahon hikit toho turuk laruhuk.

¹³⁵An Hat hamingmingangge halukema numbaharuk lit Haren telep peruk ane milal naptuk laruhun!

¹³⁶Aben Hat hele windal isaruken an nindi siyahen nil ahaluwe ik hag toho wilip atuk.

¹³⁷NIKNI Allah, Haren pikir ane eneg turuk lit alem eke hag eke hag fano roho haloho emberuk latikin.

¹³⁸Fano ane turuk inap ninggik kobog isa fug angge ili og enepmin ulug it unubam siyag-siyag ane turuk lamuhup tohon peruk lit hili emberikin.

¹³⁹An men seli roho wereg inaben Hat hele imbinahon enepeleg toho werehen an nindimu indok ambulpul hag toho laharuk.

¹⁴⁰Hat hele uruk lahenon hikit toho mun ane man ane obog toho haloho laruken an Hat hamingminganggeyen Haren uruk ane fahet nindi reg lahi.

¹⁴¹An toron welahiyon tu aben enelmahip teg angge famen Haren milal naptuk lahen ane napeleg aruhu fug.

¹⁴²Haren pikir ane eneg turukon eleg am fug angge welaruhu. An numalikisiyen telep peruk lahen ane fano reg.

¹⁴³Alem angginon nubam atisi angge famen Haren humalikisi komo eneptik inahon fahet nindimu nahiyeg toho wenggel haruk lahi.

¹⁴⁴Haren inahon arimano feneyen mun ane man ane alem obog toho hal aruhu. An fano noluk welaruhuken Haren inahon arimano fahet nindi anggarap naptuk lamin!

¹⁴⁵NIKNI Allah, an nindi obog tohowen nele hi roho Hat hubam uruk lahiyon hol niyimin. Hol niyamihinmu tuk teg ane fahet Haren kong toho imbinahon arimano anden seneg laruhuk.

¹⁴⁶An windat nabik ma ulug nele hi roho uruk lahi. Haren windat nabuhun halug humalikisi komo eneptik inag ane anden nine roho seneg laruhuk.

¹⁴⁷Mo lahik wam fugmu an in atuk lit nele hi roho let napmihin ulug heng haptuk lahi. Haren sali emberikinon hikit toho nubam timihin ulug nangno hasug lahi.

¹⁴⁸Hubanggo oho nil ili roho wereg lit Hat hawene fahet wenggel haruk lahi.

¹⁴⁹NIKNI Allah, an nele urukmu Haren hindi roho hol niyaruk laruhun. Hol niyaruk lit Haren pikir ane fahet kong toho imbinahon hikit toho nineyap naptukmu fano noluk welaruhuk.

¹⁵⁰Haren tu men ari men turuk lamuhup ulug komo nenepfag ane windal isaruk lit an nuwabul ulug mug naplug laruk inap arimano an horogma waharuk.

¹⁵¹NIKNI Allah, Hat an niraham welahen. Haren hele tem toho eneg uruk lit nit Hat humalikisi komo neneptuk lahen.

¹⁵²Haren tuk teg ane fahet komo eneptik inahon arimano mondabi welamuhup ulug imbinag ane an indam noluk atisi.

¹⁵³Ari-ari turuk lamuhup ulug komo eneptik inahon arimano an napeleg atisi fug. Ari fahet an asengseng toho weregma Haren yet niyaruk lit windat napmihin.

¹⁵⁴Hat an nibil atuk lit alem nubam lombohap naptuson haloho imbin. Haren sali emberikinon hikit toho windat napmihin!

¹⁵⁵Hat fahet ninirim peruk inaben Haren tuk teg ane fahet imbinahon yami ruruk elehen fano welamuhup fug.

¹⁵⁶NIKNI Allah, Hat humalikisi hindi anggolo enesug lahen. Haren pikir ane fahet kong toho imbinahon hikit toho an fet nasug laruhunmu an fano noluk welaruhuk.

¹⁵⁷Ap seliyon an siyahap nabul ulug mug naplug larukon anggolo wereg angge famen Haren nit humalikisi komo neneptuk lahen ane anden suhan isaruk lahi fug.

¹⁵⁸Hat hele holuk fug angge ap enele ying eneptukon yet isalug an me nape naptuk.

¹⁵⁹NIKNI Allah, Haren tuk teg ane fahet kong toho imbinahon nindi reg lahiyon yet niyimin. An fano noluk welaruhuken Haren hindi nasug lit fet nasug laruhun.

¹⁶⁰Haren tem ane eneg uruk lit pikir ane fahet kong toho emberuk lahenon mondabi eleg aruhu fug.

¹⁶¹An nubam alem elegman ap suwon-suwonen an mug naplug waharuk angge famen anden Hat hele fahet eneg nakol haruk lahi.

¹⁶²Ap ekeyen mun angge man angge yoholiyangge hilarukon fahet ahiyeg haruk hag toho anden oho Hat hawene fahet nahiyeg haruk lahi.

¹⁶³Ap enele si ane urukon fahet me napeyen nirim haruk lahi angge famen Haren tuk teg ane fahet kong toho imbinahon nindi reg lahi.

¹⁶⁴Haren pikir ane kong toho emberuk lahenon fahet likiya hupmu wel haptuk lit hup misihim-misihim ninggik sabirenam fog haptuk lahi.

¹⁶⁵Ap san ari-ari turuk lamuhup ulug komo neneptik inahon inindi rehon arimano unuyug salog-malog angge roho wat ta fug angge mondabi fano welamuhup.

¹⁶⁶NIKNI Allah, Haren nit humalikisi komo neneptik inahon hikit toho turuk lahireg Haren windat nabik watmihinen nangno hasug lahi.

¹⁶⁷Hat hele uruk lit komo neneptuk lahenon fahet nindiyen ulug nundama foroho lahi.

¹⁶⁸Haren tu men ari men turuk lamuhup ulug komo neneptuk lahenon hikit toho anden turuk lahi. Mun ane man ane anden turuk lahiyon Haren yet niyaruk lahen.

¹⁶⁹NIKNI Allah, anden nele hi roho hat hubam let nabik ma uruk lahiyon hol niyimin! Haren sali irikinon hikit toho an nindi anggarap napmihin.

¹⁷⁰Anden Hat hubam heng haptuk lahiyon holeg lit Haren sali emberikinon hikit toho windat napmihin.

¹⁷¹Haren hili angge imbinahon milal naptuk lahenon fahet anden Hat wel haptukmen eneg welaruhuk.

¹⁷²Haren pikir ane kong toho imbinahon fahet komo neneptuk lahenma an nahiyehen Hat hawene fahet sini uruk latmin.

¹⁷³Hat hele eneg holtuk laruhuk ulug kong toho emberikik angge re Hat hinggik hineyonen let naptuk laruhun.

¹⁷⁴Haren ari-ari turuk lamuhup ulug kong toho imbinahon fahet nahiyeg haruk lit fanowap naptuk laruhun ulug nasehet toho wenggel haruk lahi.

¹⁷⁵Haren pikir ane fahet kong toho imbinahon arimano seneg lit nine aruhukteg an noluk wereg li Hat wel haptukmen eneg welaruhuk.

¹⁷⁶An Hat hamingmingangge welahi angge famen wam domba longgo urukon hag toho la wam turuk lahi. Ari fahet hun aruwen Anden numalikisi komo eneptik iyahon apeleg atisi fug ulug yami nabik watmihin.