Read Angguruk Yali MAZMUR 132 Bible Online

MAZMUR 132 - Angguruk Yali bible

MAZMUR 132

¹O Yerusalem sembahyang uhuk ulug laruk lit sini yunggultuk latfahon tu: NINIKNI Allah, Haren Daud fam wenggel haruk lit aren asengseng toho turuk latisi ane hapeleg aruhu fug.

²Aren Yakub IKNI mondabi hine roho welahenon fam sali emberuk lit,

³”An nibam kulug kel taruk lit nibalma nohuk fug angge weregman eneg

⁵Hat Yakub IKNI mondabi hine roho welahenon fahet o eke wiri fuhuk,” ulug sali emberisi.

⁶Nit o Betlehem wereg lit hol harukmen peti Allah Wene Numen haharehon elma kilabeg angge ino o Yaar wereg urukmu hol harukuk. O Yaar larukukteg peti ino weregma hiyaharukuk.

⁷Niren nenele uruk lit, ”NINIKNI Allah ibam lulteg lehoma hur atuk angge alukema nenelenggen fam hur amulteg wel tulen maniyek!” urukuk.

⁸”NINIKNI Allah, peti aru walug waharukmu Har oho in atug peti ino iraham lamihinteg kel taruk laruhun ambeg kik watmihin. Peti aru feneyen Hat hine inam atuk.

⁹Hat humalikisiyen enehiyeg toho sini yunggultuk lamag! Hamingmingangge imam arimanowen Haren peruk lahen ane hikit toho turuk lamag!” urukuk.

¹⁰Hat hamingmingangge Daud fam sali emberikinon wenggel haruk lit ap suwon Haren mumal tarikinon ino miyaloho hik isa fug!

¹¹ NIKNI Allah, Haren Daud fam sali emberikinon ino nin uwag oko hilahun fug. Haren sali emberuk lit, ”Hat humalikisi sehelimuwon misig hubalma ap suwon welaruhuwon Anden unduhuk fuhuk.

¹²Hat humalikisiyen An nele sobir isa fug angge sali emberikikon hikit toho turuk lamuhupmu iren endebuhubon oho hat hubalma in amuhup. It arimano ap suwon weregman eneg welamuhup,” ulug sali emberikin.

¹³Tom Sion ino NINIKNI Allahn yug toho welaruhuk ulug mumal tarisi.

¹⁴”Anden perikik ane hikit toho tom aru fam mondabi welaruhuk,” ulug ngiyap tarisi.

¹⁵”Anden Sion inap naruk angge anggolo og isarukmu it enenggengge elehonen oho enehum ouk toho naruk lamuhup.

¹⁶It onowesi imam arimano Anden inineyap eneptukmu onotsi enehiyeg toho wereg lit sini yunggultuk lamuhup.

¹⁷Tom tu famen Dauren ondohowonen ondohowon eke mondabi ine roho welaruhuwen mumal tahuk. At ino Anden forohoman eneg iral mondabi war atuk elehon hag toho welaruhu.

¹⁸Ap at men seli roho welamuhubon arimano Anden mondabi ininggaliyap eneptuk lit ap suwon mumal tahukon ino ebene aliliyangge umbagpag turukon lahabe fuhuk,” irisi.