Read Angguruk Yali MAZMUR 139 Bible Online

MAZMUR 139 - Angguruk Yali bible

MAZMUR 139

¹Dauren sini milaltuk lit yunggultuk latfahon tu: NIKNI Allah, Haren an nubabut pal niyarikinteg an nundama wenggeltuk lahi ane holuk teg lahen.

²An heriyeg lahi ane unduhuk lahi ane Hat holuk. Anden timin peruk lahi ane yatman holuk atuk.

³Anden yabuk wituk lahi ane men nohoruk lahi ane men Haren yet niyaruk lahen. An kema-kema larukmu Hat holuk.

⁴An nele uwan uk fugmu Haren tu imisi ulug tam holuk atuk.

⁵Haren mase roho kilap nasug lit hinggik ineyonen sen nasug lahen.

⁶Haren an nubabut fahet fano roho holuk teg lahen ane ari mondabi palimu rehen anden fuki roho wenggeluk fug teg lahi.

⁷Allah alukeman longgo imin ulug kema lahi ha reg? Allah il uman toho lamin ulug kema hirag arik lahi ha reg?

⁸An poholma lahale halug oho Hat lema welalen. Ap warehon wereg ambeg kel tamin ulug lele halug oho Hat eke welalen.

⁹An suwe aherabul lamlam laruk hag toho mo lahik waharuk ambeg lele halug oho saho ahik yenggelehon atog fil lele ambeg oho

¹⁰Hat hinggiken sen naplenteg hondog naptuk lalen.

¹¹O hiken an hililip naptukmu an walinggoho hup amag ulug heng ele halug

¹²hik ino fahet Haren hik teg pelen fug. Hup ino Hat hilmu o ilingge hag lalep.

¹³An nisinga ahummuwen Haren an lal naptuk lit nundama wereg angge oho sum uruk hag toho wal naptikin.

¹⁴An mondabi fano roho wal naptikinon fahet Hat wel haptuk lahi. Mun ane man ane obog toho aben tuk fug teg ane Haren turuk lahenon fahet an nindimuwen wenggel haruk lahi.

¹⁵An nisinga ahummuwen nuwag wereg atuk lit ahandip atisimu nebe map toho su atikim Hat holohotman hirag am fug teg latikik.

¹⁶An nisinga ahummu weregma Haren yet niyarikin. Fobik o eke sambil eke sambil an nubam teko laruk laruhu ane obog toho an uwan indag am fugmu Hat tam holuk teg lit suwesingga fam haharoho emberikin.

¹⁷Nikni Allah, mun ane man ane fahet Haren peruk lahenon anggin anggolowen anden fuki roho wenggeluk fug teg lahi. Haren alem anggolo fahet peruk lahenon arimano anden winag harukmu ik yinggi mondehon tot tegma Haren peruk lahenon arimano palimu reg. Hup hunduko Hat fahet wenggel haruk lahi angge famen wirim atuk eleg.

¹⁹Nikni Allah, onolok ane turuk inap arimano Haren unusuhun. Ap enemep hinang taruk inap arimano an wereg ambehen yanggal enebuhun.

²⁰Iren Hat habug uruk lit hunuk fanowon siyahap turuk.

²¹NIKNI Allah, Hat fahet ninirim peruk inap anden oho it fahet nirim peruk lahi. Hat hele soptuk inap anden nelmahip enesug lahi.

²²Anden it seliyap eneptuk lit mondabi nirim peruk lahi.

²³Nikni Allah, an nubabut pal niyaruk lit nundaman wenggel haruk lahi ane wal niyimin!

²⁴An nele pisan isalug laruk ano ulug yet niyamihinteg kalem pikiron laruk laruhuken hondog naptuk laruhun.[19]