Read Angguruk Yali MAZMUR 140 Bible Online

MAZMUR 140 - Angguruk Yali bible

MAZMUR 140

¹Daud inowen sini milaltuk lit yunggultuk latfahon tu:

²NIKNI Allah, ap onolok ane turukonen nuwabuhup tohon ili og nabin! Ap siyahon arimano ininggikmuwen tel nabin!

³It unundaman nonolok ane tulen nanggintul peruk lit likiya hupmu tog abil larukmen eneg wereg.

⁴Enembilikmu pisanggo ayeg olokon hag toho weregma enele onolok ane uruk lit ap unusuruk.

⁵NIKNI Allah, Hat fahet ninirim peruk inaben nuwabuk nowen an fet nasug latmihin! Ap onolok ane turukonen an miyal nabul ulug kahal nasuhon onolohotman ili og nabin!

⁶Hi-hemet toho turukon arimanowen an sen nabul ulug hirahoma yebangge yep turusa. An kalem laruk lahi ke hele ambuwe roho kinangma saltusareg luhur amag ulug kahal nasug.

⁷Anden NINIKNI Allah ubam nele uruk lit, ”Hat Allah an Nikni welahenon, anden heng haptuk lahiyon hol niyimin!” uruk lahi.

⁸Allah NIKNI, Hat hineyonen hirag naptuk lahenon, an tog elma larikik sambil ino Haren nahap mapmu naptikin.

⁹NIKNI Allah, Hat enembol yig hutuk inap unundaman tila perukon hikit toho tuk nowen sen enesug lamin. Iren nonolok ane tul perukon hikir aruhu rohon!

¹⁰Ap seliyonen an waling nasug lit palimu amul ulug turuk angge famen iren an siyahap nabul urukon ari ininggareg unubam amag.

¹¹Indok fut-fat harukon unubam pilabik wamag! Indokma kukag, pulema wambukag! Nin hebeloho in amuhup fug.

¹²Ap enebug il larukon arimano kinang tu fam welamuhup fug. Onolok ane turukon arimano siyahonen muko-siko larukmen eneg welamag.

¹³NINIKNI Allahn ap inilaheg toho werehon ili og eneptuk lit ap inine elehon unubam alem werehon haloho emberuk ane an noluk teg lahi.

¹⁴We tem toho Haren fano peruk lahen ane turukon arimanowen Hat hunuk palimuwap turuk lamuhup. Inindi pikit toho werehon arimano Hat halukema welamuhup.