Read Angguruk Yali MAZMUR 142 Bible Online

MAZMUR 142 - Angguruk Yali bible

MAZMUR 142

¹Daud owik elma wereg lit sembahyang ibahon fahet ap inindi anggar amag ulug sini yunggultuk latfahon tu:

²Anden nele hi roho NINIKNI Allah ubam sembahyang uruk lahi. Nele hum toho At ubam heng turuk lahi.

³An asengseng toho wereg lit nundaman wenggel haruk lahiyon hiyag utuk lahi.

⁴An siyag atmin perukmu Hat Allahn eneg an la reg lahi abunggalem holuk teg lahen. An lamin peruk lahi ke ap seliyonen yebangge hirako yep turusa.

⁵Anden ninggik pikit fil hare fil yet harukmen ap misihen oho an nubahet wenggel niyaruk eleg, ili og naptuk eleg, yami naptuk eleg.

⁶Ari fahet anden nele hi roho Hat NIKNI Allah hubam uruk lit, ”Hat hapma eneg hirag arik la reg lahi. An noluk wereg lit Hat hubam eneg welahi,” uruk lahi.

⁷An mondabi nine eleg atisimu Haren let nabin ulug heng haptuk lahiyon hol niya ma! Ap inineyonen an nine eleg atikikon aru mug naplug larukmu Haren windat nabik watmihin!

⁸Haren an hele waroho kilap naptusa ambehen hondog naplug wilip atmihinmu anden Hat hunuk palimuwap habuhuk. Hat hele holtuk inaben an waling nasugmu Allahn fano ane nubam tirisi ulug Hat hunuk suwap tuhuk.