Read Angguruk Yali MAZMUR 143 Bible Online

MAZMUR 143 - Angguruk Yali bible

MAZMUR 143

¹Dauren sini yunggultuk latfahon tu: NIKNI Allah, anden sembahyang uruk lahiyon holeg lamin! Anden Hat heng haptuk lahiyon hol niyimin! Haren humalikisi hinggik kobog isa fug angge hal eneptuk lahen. Ari fahet anden uruk lahiyon holmihinteg let napmihin.

²Hat holohotma ap siyag ane turuk elehon misig oho wereg eleg. Ari fahet an Hat hamingmingangge nubam alem wereg ano ulug kim niya fug.

³Ap seliyonen an mug naplug laruk lit unuyuhen sobit-sabat niyarusa. Ap indam war atfahon o hik tegma wereg hag toho an oho o hik teg ambeg kilap naptusama welahi.

⁴An siyag atmin peruk lit nindi pong-pong angge ruruk.

⁵Mun ane man ane indam teko larisiyon fahet wenggel haruk lahi. Hat hinggik ineyonen turuk latikinon fahet ebet haruk lahi.

⁶An ninggik leho lit hubam sembahyang uruk lahi. Kinang lilohonen osit pilabik walep ulug yet teg hag toho anden oho Allahn fano ane nubam telep ulug nindi ouk haruk lahi.

⁷NIKNI Allah, an nine mondabi eleg atisimu anden sembahyang uruk lahiyon holeg lit folo-folo let napmihin. An nubam horohole hirag ta fug! Hirag tahun halug ap warehon wereg ambeg wamburukon hag toho welaruhuk tohon!

⁸Hup-hup angge sakan turukon fam Haren an nubam hele uruk lit ninggik kobog hiya fug angge nindi hiyaruk lahi ulug hiyag nutuk laruhun. Allahn yet niyamisi ulug Hat yet hasug lit hubam eneg wenggel haruk lahireg Haren an nubam hat lahun ke tu ulug hiyag nutuk laruhun.

⁹Ap seliyon ininggikmuwen windat nabin! Hat NIKNI Allahn eneg an nahap hirag nabuk teg lahen.

¹⁰Hat an Nikni Allah wereg lit Haren fano peruk lahen ane milal nabin. Hime fanowonen kalem pikiron fam hondog napmihin.

¹¹Hat NIKNI Allahn tam sali imbinag ane hikit toho fano noluk welaruhuken nineyap napmihin. Mun ane man ane haltuk lahenonen an asengseng toho welahiyon windat napmihin.

¹²Hat humalikisi hindi enesug lahenonen an men seli roho wereg inap arimano elehap enebin! An siyahap nabul ulug turukon arimano siyahap enebin! An Hat hamingmingangge welahiyon wenggel niyimin!