Read Angguruk Yali MAZMUR 144 Bible Online

MAZMUR 144 - Angguruk Yali bible

MAZMUR 144

¹Dauren sini yunggultuk latfahon tu: NIKNI Allah an nubahet helep ubule hag toho wereg ulug At wel turuk lahi. Haren tog aptuk ane fahet milal naptuk lahen.

²Hat hindi nasug lahenon o yaron uwag ineyon ap seliyon kuk fug tehon hag toho wereg lit an ili og naptuk lahen. Hat tog piyabangge hag toho wereg lit mapmu nasug lahen. Haren ap o pumbuk kema-kema werehon an napma welamuhuben apmayap eneptuk latikin.

³ NIKNI Allah, nungge fahet nit ap kinangmon toron welahe angge famen Haren wenggel nisaruk lit fet nenesug lahen?

⁴Ap kinangmon we misihim sat fu roho teng urukon hag toho wereg. Ap enehuhe folo-folo longgo urukon hag toho wereg.

⁵Hat NIKNI Allahn pohol kinang horogma pilabik watmihinteg tom sen hamihinmu indok hubu wilip atmisi.

⁶Tog pising-pasang turuk lit ap seliyon hik-hak isamihin. Lebeglu fam ilte-kalte roho unusin.

⁷Hinggik poholman pilabik waharuk lit ik fu waharuk ambehen an lisoho og nabin! Ap o winamon ininggikmuwen tel nabin!

⁸Iren enele si ane uruk lit ininggik pikiron leho lit nenele tik-tem toho ehe uruk angge famen un ane uruk.

⁹Pinggong humon hele numen ililohon kong til laruk lit Hat Allah fahet sini keron yunggultuk latmin.

¹⁰Ap suwon arimanowen ap seliyon apmayap enebukag ulug Haren inineyap eneptuk lahen. Hamingmingangge Daud oho karohen wabuhup tohon windatuk lahen.

¹¹An ap winamon ininggikmuwen tel nabin! Iren ininggik pikiron leho lit nenele tik-tem toho ehe uruk angge famen un ane uruk.

¹²Nenemlohokisi kabinimu yaho angge hum toho fitukon hag toho welamuhup. Neneholani o fanowon ubahat mur ka lahabehon hag amuhup.

¹³Niren yabukmuwen yahaltuk lahe angge eke hag eke hag ninibam walug watug foroho lamuhuk ambeg keleg aruhu. Wam foroho ambehen nenembohom kambing domba arimanowen umalik ondoko pilili-palala rurukmen eneg enebe teng-teng angge winag isa fug toho welamuhup.

¹⁴Nenembohom sapi arimano umalik anggolo enehummu atuk lamuhupmu enehummuwen war atukon men indag atukmu war atukon men eleg laruhu. Ari reg laruhumu ninibam pumbukmuwen ap enele ya nga uruk lamuhup fug.

¹⁵Ap o pumbuk eke ari hag toho welamuhup halug enehiyeg toho welamuhup. Iren NINIKNI Allah wel turuk halug we tem toho enehiyeg haruk lamuhup.