Read Angguruk Yali MAZMUR 145 Bible Online

MAZMUR 145 - Angguruk Yali bible

MAZMUR 145

¹Dauren Allah wel turuk lit sini yunggultuk latfahon tu: Nikni Allah, Hat hunuk palimuwap turuk lit Nikni suwon Hat eneg welahen ulug wel haptukmen eneg welaruhuk.

²Likiya hupmu Hat fog haptuk lit hunuk leho ferukmen eneg welaruhuk.

³NINIKNI Allah mondabi palimu wereg ulug ap obog tohowen wel haptuk. Haren su ane turuk lahenon aben fuki roho wenggeluk fug teg.

⁴Ap fobik welamuhubon arimanowen iren endebuhubon unubam hiyag isaruk lit, ”Allah ine roho werehon inowen su ane turuk latisi,” ulug hiyag isil laruk lamuhup.

⁵Iren Hat mondabi suwon hebe umbagpag turuk lahenon hubahet hiyag isaruk lamuhup. Aben tuk fug teg ane Haren turuk lahenon fahet anden wenggel haruk laruhuk.

⁶Hat hine roho welahenon inowen ap enekol atuk ane turuk lahenon fahet iren hiyag isaruk lamag! Aren alem suwon turuk latisi ulug ap onolukap eneptuk laruhuk.

⁷Hat hubabut fanowon fahet ap hiyag isaruk lit Allahn fanowap neneptuk latisi ulug sini yunggultuk lamuhup.

⁸NINIKNI Allah umalikisi indi enesug lit inilaheg ulug let eneptuk. At indimu folo-folo olok am fug angge ap obog toho indi isaruk.

⁹Ap obog toho unubam fano ane eneg turuk lit Aren wal tibag angge obog toho indi enesug lit wereg.

¹⁰NINIKNI Allah, Haren wal eneptik inag angge obog tohowen Hat wel haptuk lamag! Humalikisi obog tohowen Hat fog haptuk lamag!

¹¹Ninikni suwon inowen nit obog toho fet nenesug ulug Hat hunuk palimuwap turuk lamuhup. Hat mondabi hine reg lahenon fahet ap hiyag isaruk lamuhup. Hat Ninikni suwon hine reg lahenon fahet ap obog toho inindi anggar amag.

¹³Haren kinang aru seneg lit ap obog toho fet enesugmen mondabi welaruhun. NINIKNI Allahn sali emberukon hikit toho turuk. Aren ap fahet nindi ulug wenggel haruk lit mun ane man ane turuk.

¹⁴Ap mako wamburukon arimano Aren aho eneptuk lit enembol simbuk toho werehon ininggik lisoho unduhuk feseruk.

¹⁵Haren wal eneptik inag angge obog tohowen Ninikni Allahn let nenepmisi ulug Hat nangno haptuk lit wereg. Suburu narukon horog teg li Haren naruk angge og isaruk lahen.

¹⁶Hat hinggik filalag turuk lit mun ane man ane it eneseher angge og isaruk lahen.

¹⁷NINIKNI Allah inowen pikir ane eneg turuk. Ap fahet nindi ulug wenggel haruk lit mun ane man ane turuk.

¹⁸At ubam sembahyang uruk inap iniraham At laruk. Inindimuwen tem toho wenggel haruk lit heng turuk inap Aren let enebik waharuk.

¹⁹At fahet enekol toho wereg inaben Ninikniyen nunubam telep peruk ane hikit toho unubam turuk. Iren At ubam enele hi roho urukon holtuk lit windat eneptuk.

²⁰Ap At fahet inindi rehon Aren wanggi war enesug lit onolok ane turukon siyahap eneptuk.

²¹Anden likiya hupmu NINIKNI Allah wel turuk laruhuk. Aren wal tibag angge arimano obog tohowen At unuk fanowon palimuwap turukmen eneg mondabi welamuhup.