Read Angguruk Yali MAZMUR 146 Bible Online

MAZMUR 146 - Angguruk Yali bible

MAZMUR 146

¹NINIKNI Allah wel turuk lamek! An nindiyen oho At fog turuk latmin.

²An noluk wereg lit NINIKNI Allah sini fam wel turukmen eneg welaruhuk.

³Ap ununuk suwonen nit fanowap nenebuhup puk fug. Ap kinangmonen let nenebuk fug teg.

⁴Sat unubam werehon eleg aruhumu suhuloho kinang amuhup. O ino sambil iren tila perukon oho eleg aruhu.

⁵Ap san an let naptukon Allah Yakuben wel turuk latfahon ino wereg ulug onoluk tehon arimano enehiyeg toho welamuhup. An NIKNI Allah ubam eneg welahi perukon enehiyeg haruk lamuhup.

⁶At inowen pohol ha kinang ha werehap turuk lit ik ahum suwon undama werehon men wal tibag. Aren sali emberukon hikit toho turukmen eneg welaruhu.

⁷Aben apmayap eneptukon arimano ili og eneptuk lit suburu obok toho werehon suburu og isaruk. Ininggik hele wat eneptukon NINIKNI Allahn lol eneptuk.

⁸NINIKNI Allahn inil hupnihon inil fenggenap eneptuk lit enembol simbuk toho werehon ininggik lisoho unduhuk feseruk. Aren fano peruk ane turukon arimano NINIKNI Allahn indi enesug.

⁹NINIKNI Allahn ap pohon ili og eneptuk lit malik suwarehon men hiyap yuwohon men aho eneptuk angge famen At fahet ninirim peruk inap un ke lawag ulug inindi nonghonga feseruk.

¹⁰NINIKNI Allahn nit fet nenesugmen eneg welaruhu. Hit Sion hinap Hinikni Allah mondabi wereg lit hiren ondohowonen endebuhubon arimano oho fet enesug laruhu. NINIKNI Allah wel turuk lamek!