Read Angguruk Yali MAZMUR 17 Bible Online

MAZMUR 17 - Angguruk Yali bible

MAZMUR 17

¹Dauren sembahyang uruk latfahon tu: NIKNI Allah, aben alem unon nubam lombog naptuken an nibil amin ulug heng habik wahi. Un ane uk fug angge Hat hubam nele hi roho uruk lahiyon ari hol himin!

²Anden siyag ane tirikik fureg nele tem toho uruk lahiyon yet niyalug unggum ari kong nitmihin.

³An nindimuwen wenggeltuk lahiyon Hat holuk. Yoho hup tu an nohorukmu Haren an nubabut pal niyamihinteg indimuwen siyag ane wenggeltuk eleg ulug holuk atmisi. An nambiliken oho siyag ane uruk lahi fug.

⁴Ap winonen mun ane man ane til-wil norukmu yet isaruk latikik angge famen an Haren komo urukon hikit toho eneg turuk latikik. Onolok inap laruk abunggalem an larikik fug.

⁵Haren hiyag nisarikin ke eneg laruk lit an nuyug salog-malog angge roho fuk turuk latikik fug.

⁶Allahn nele holtuk ulug noluk teg lit Hat hubam sembahyang uruk lahi. Hisanggo leho femihinteg an nele urukmu holeg lamin.

⁷Hindi niyaruk lit aben tuk fug teg ane nubam timihin. Hele yong haptuk inap onolohotman hirag-hirag lul ulug hapma larukon arimano Haren ili og eneptuk lahen hag toho an oho ili og nabin.

⁸Aben inilanggen foroho hag toho nanggengge ulug wanggi waroho fet nasug lamin. Nindi yuwag toho welamag ulug haherabulen hondo nasug latmihin.

⁹Hat lin hubahalug siyag ane turuk inaben an waling naptuk lit il hiraho fusul ulug nuwabuk oho turukon yet isimin.

¹⁰It arimanowen ap inindi enesug lam fug angge enele winik-wonog toho uruk.

¹¹Ketiya eneg an nuwabul ulug wahasareg walinggoho kilap nasug. An fuk-fak toho kinangma hik nuyul ulug turuk.

¹²Olomeneyen pak senetminteg senggeloho namin ulug hirahoma kahaleg hag toho ap ariyan an sap nasug.

¹³NIKNI Allah, onolok inap aruma ininggikmuwen windat napmin ulug in atug it enelukema lamihinteg fuk-fak toho kinangma hik isalug karog fam pinggi unusimihin.

¹⁴Hinggik ineyonen an it ininggikmuwen taluk naptuk lit it nalug war amusa angge og isamihinmu enehum ouk toho nalusareg anggolo rehen minggiroho embeluson arimano unumalikisi unumbusagsi menen naruk lamuhup.

¹⁵Anden Hat hele holtuk lit siyag ane tirikik fureg an nohoruk ambehen in atuk lit nil ili aruhukteg Hat horohole yet hahuk. Aben naruk angge enehum ouk toho naruk lit enehiyeg haruk hag toho anden oho Hat hahuhe yet hiyaruk lit nahiyeg haruk laruhuk.