Read Angguruk Yali MAZMUR 19 Bible Online

MAZMUR 19 - Angguruk Yali bible

MAZMUR 19

¹Dauren sini milaltuk lit yunggultuk latfahon tu:

²Poholen Allah suwon wereg ulug wel turuk. Sing poholen Allahn wal napfag ulug fag toho uruk.

³Ari fahet ilingge ekeyen eke fam hiyag utuk. Hup ekeyen hup eke olukap turuk.

⁴Enele uk fug angge weregma eneplohok oho holtuk eleg angge famen

⁵wene iren wiliptukon ino kinang atogman atogma laruk lit o kema-kema saho ruruk. NINIKNI Allahn mo fahet poholma o witfag.

⁶O sakan turukmu mo ino aben uhe ket hilalug ibamen wilip atuk hag toho lahik waharuk. Ambong se roho turuk ahunen hulu-hala roho laruk hag toho waharuk.

⁷At ino pohol atogman atogma walinggoho larukmu mun angge man angge at olohotma mapmu ruk fug tehen obog toho inahan atuk.

⁸NINIKNI Allahn aben turuk lamuhubon fahet kong toho imbibag ane mondabi fano reg lit ap inindi wirikap eneptuk. NINIKNI Allahn tilihip uruk ane un ane uruk elehen ap enepelehon inindi anggarap eneptuk.

⁹NINIKNI Allahn milal eneptuk ane wirim tehen ap inindi enehiyehap eneptuk. NINIKNI Allahn pikit toho komo eneptuk ane ariyen ap inindi selehap eneptuk.

¹⁰NINIKNI Allah fahet enekol toho wereg ane ari fano werehen eleg aruhu fug. NINIKNI Allahn imbibag ane obog toho arimano hikit toho mun ane man ane alem werehon fano haloho la reg.

¹¹Umbagpag turuk angge emas orohole mondabi fanowon men kin ahaluwe unduk fanowon men we tot apma regma Allahn kong toho imbibahon arimano palimu wereg.

¹²Obog toho arimanowen an hamingmingangge nindi anggarap turuken holtuk lahi. Hat hawene seneg inap arimano fahet onggo suwon wep toho wereg.

¹³Ap ekeyen fano ane turuk lahi peruk angge famen siyag toho teko laruk halug at inowen siyag ane tihi ulug oluk am teg? NIKNI Allah, napelehen siyag ane turuk lahiyon fahet pet nabuhun fug!

¹⁴Hat enembol yig hutuk inaben an nindi kahal nabuhup tohon[3] Haren fet nasug laruhun halug Anden alem angginon tuk fug angge nubabut seleg toho welaruhuk.

¹⁵NIKNI Allah, an nindimuwen wenggeltuk lit nele ihiyon ari Haren fano ehek ulug holmihin. Hat an fahet helep owik hag toho wereg lit windat naptuk lahen.