Read Angguruk Yali MAZMUR 20 Bible Online

MAZMUR 20 - Angguruk Yali bible

MAZMUR 20

¹Dauren sini milaltuk lit yunggultuk latfahon tu:

²Aben hat siyahap habul ulug wamuk oho turukmu haren NINIKNI Allah fam hele irikim Allahn holuhu. Allah nunumba Yakub inowen oho unuk palimuwap turuk latfahonen hat apmayap habuk nowen ulug wanggi waroho fet hasug laruhu.

³Ibil atmin ulug At ibam tom Sion famen let habik waruhu.

⁴Haren At ubahet nungge-nungge emberuk lahenon fahet fano embehek puhu. Wam waroho hubu lahaptuk lahen ane fahet indi haruk laruhu.

⁵Hat hindimuwen og netep peruk laruhunon og hutuk lamag. Haren timin peruk laruhunon obog toho fano teko lawag ulug let haptuk lamag.

⁶Let haptukmu palimu aruhun halug NINIKNI Allahn windatisi ulug At wel turuk lamuhuk. Ninikni Allah unuk eneg su reg ulug enehangge sum lahaptuk lamuhuk. Haren At ubam heng turuk laruhunon obog toho og hutuk lamag.

⁷NINIKNI Allahn ap suwon welaruhun ulug mumal tarisiyon ibil atuk ane ketiya an noluk aha. Ap suwon inowen ele ubam urukmu NINIKNI Allah poholmon inowen hol halug inggik ineyonen let turuk.

⁸Ap wam kuda fam lahalug tog silimu larukonen nenembohom ine fam ap seliyon apmayap enebul peruk. Ap kereta wam kudan lisoho walug laruk angge fam lahalug larukonen kereta folo-folo larukon famen palimu amuhuk peruk angge famen niren NINIKNI Allahn eneg let nenebuhu ulug wenggel haruk lahe.

⁹Ap arimano obog toho waroho lin-lan uhupmu nit eneg ninine roho unduhuk lamuhuk.

¹⁰NINIKNI Allah, nit nonowe ap suwon ino let tik watmihin. Nit nenele hubam urukmu hol nisamihin!