Read Angguruk Yali MAZMUR 22 Bible Online

MAZMUR 22 - Angguruk Yali bible

MAZMUR 22

¹O hil yinggirukmu wam rusa heyon larukon fahet sini urukon wirim toho Dauren milaltuk lit yunggultuk latfahon tu:

²Nikni Allah, Nikni Allah, nungge fahet an numbahalug welahen? An let nabin ulug nele ine roho uruk lahi angge famen Hat yatma wereg lit let naptuk lahen fug.

³Ilingge nele hi roho uruk lahi angge famen hele uruk lahen fug. Hubanggo sembahyang uruk lahi angge famen nindi yuwag atuk eleg.

⁴Hat hebe usa fulu reg hahun lehoma heriyeg lahenon Israel ninaben wel haptuk lahe.

⁵Nunumbasiyen Hat hubam eneg wenggel haruk latfagma Haren it windat eneptuk latnag.

⁶Iren let nenebin ulug Hat hubam enele hi roho uruk lit koloweg wilip atuk latfag. Iren windat nenepmisi perukmu Haren embeseruk latnag fug.

⁷An ap welahi angge famen imbalo hag toho wereg ulug ap obog tohowen inda yako apmayap naptuk.

⁸It obog tohowen yet niyaruk halug enembilik putuk turuk lit ununggul kani ruruk lit ninggaliyap naptuk.

⁹Iren enele uruk lit, ”IKNI Allah fam wenggel haruk angge re IKNIYEN windatmisi. Allahn at fahet nindi pemisi halug let timisi,” uruk.

¹⁰Haren nisinga ahummuwen indag naptikinteg fano welamag ulug nisinga ahoma walinggi nubaharikin.

¹¹Indag atikik sambilen Hat hinggikmu welahi. Nisinga ahummuwen wilip atikik sulen An nikni Allah Hat eneg welahen.

¹²Alem angginon an nubam arik ohoma ap an let naptukon elehen Hat an let nabuk fug angge numbahalug yatma welaruhun fug.

¹³Wam sapi olokon o Basan werehon hag toho ap seliyonen siyahap nabul ulug waling nasug lit wereg.

¹⁴Mene olokon inowen ap namin ulug ambilik iya reg lit ele hum toho ngu ruruk hag toho nuwabul ulug turuk.

¹⁵Ik hilil isarukmu laruk hag toho an nine eleg atisi. Nuwag obog toho eleg atuk lit nunu eneg tamuk irisi. Hindali indoken wiyig atuk hag toho nindi wiyig atisi.

¹⁶Nindi nakolen nanggolobag e lilohon hag atisimu[4] nambilikanggen nele lamlam fam lombog irisi. NIKNI Allah, ap warehon hag toho ulmu numbaharikinteg welahen.

¹⁷Mene olokon hag toho onolok ane turuk inaben waling nasug lit ninggik men nuyug men hak naptuk.[5]

¹⁸Nuwag obog toho inam ke weregma inilanggen hina ruruk lit yet niyaruk.

¹⁹Nasum wal taneg hulul ulug enehangge hik turuk.

²⁰NIKNI, Hat yatma welam fug! Hat hamuwen nineyap nabuk tehen folo-folo let nabik ma!

²¹Ap seliyonen nuwabuhup tohon nahap siye nabik ma! Meneyen sen nabuk nowen windat nabik ma!

²²Olomene olokon ambilikmuwen taluk naptuk lit sapi andimbuk inowen nuwaruhu rohon windat napmihin. Nikni, Haren an nele holehen.[6]

²³Haren an nubam turuk lahen ane fahet nori fam hiyag isaruk laruhuk. Hat humalikisi enesehelimuwen Hat hunuk palimuwap haptuk laruhuk.

²⁴NINIKNI Allah fahet henekol toho welahebonen At wel turuk lamuhup! Yakub umbusagsi Israel hinap welahebonen At suwon wereg ulug hi ruruk lamuhup.

²⁵Ap ine elehonen asengseng harukmu Allahn embesemin peruk eleg. At inowen let nabin ulug heng urukmu ambol yig um fug angge ele holtuk.

²⁶Haren turuk lahen ane fahet Hat humalikisi palu roho wereg ambehen anden wel habuhuk. Hat fahet enekol toho wereg inap enelukeman Hat og huruhuk irikik angge umbuhuk.

²⁷Ap enengge elehonen naruk angge enehum ouk toho naruk lamuhup. Hat NIKNI Allah yami haptuk inaben wel haptuk lamuhup. It arimano enehiyeg toho weregman eneg welamuhup.

²⁸O pumbuk obog toho kinang atogman atogma werehonen Allah fam nin wenggel haruk lamuhupteg At ambeg suhuloho waharuk lamuhup. Ap enele wal taneg urukon At alukeman kinangma sahung atuk lit hi ruruk lamuhup.

²⁹NINIKNI Allah eneg ap suwon wereg lit ap o pumbuk obog toho fet enesug.

³⁰Ap suwon welahe peruk inap obog toho At olohotma kunuk toho hur arik waharuk lamuhup. Ap kinangmon ilamna roho werehon obog toho At alukema ying arik waharuk lamuhup.

³¹It fobikonen NINIKNI Allah wel turuk lit unumalikisi oho Allah unuk hiyag isaruk lamuhup.

³²NINIKNI Allahn umalikisi windat eneptuk latisi ulug fobik indag amuhubon oho hiyag isaruk lamuhup.