Read Angguruk Yali MAZMUR 25 Bible Online

MAZMUR 25 - Angguruk Yali bible

MAZMUR 25

¹Dauren sini yunggultuk latfahon tu: NINIKNI Allah nindi fam wel turuk lahi.

²Anden Hat hubam eneg wenggel haruk lahi. An men seli roho werehonen an inda yag nabuhup tohon numbahuk fug.

³Ap inindi wirik toho welam fug angge Hat enembol yig hutukon arimano siyag amuhup angge famen Allahn windat nenepmisi ulug yet hasuhon misig oho embeseruk lahen fug.

⁴NIKNI Allah, fano lawag peruk lahen abunggalem hiyag nimin! Anden turuk laruhukon fahet komo nabin!

⁵Hat men nininggik ahandip toho wereg lit Haren fano perukon hikit toho turuk laruhuken milal napmihin. Haren fet nasug lahenma likiya hupmu yet hasugmen eneg welahi.

⁶NIKNI Allah, indamen tulug ketiya oho Hat humalikisi hindi enesug lahen ane umbusuhun fug!

⁷An kabinimu siyag-siyag ane turuk latikikon fahet ebet haruk laruhun fug. Hat hubabut fanowonen an fahet wenggel niyaruk lit hindi nasug lamin.

⁸NINIKNI Allah indi fano reg lit we pikir ane eneg turuk. Siyag-siyag ane turukon arimano kalem pikiron lawag ulug komo eneptuk.

⁹Ap inilaheg toho werehon fano lawag ulug kalem pikiron yag isaruk. Anden fano peruk lahiyon onoluk amag ulug milal eneptuk.

¹⁰NINIKNI Allahn hit an men nininggik ahandip toho wereg lit ari-ari turuk lamuhup ulug sali imbibag ane senehon arimano hondog eneplug laruk lit inggik kobog isa fug angge indi isarukmen eneg welaruhu.

¹¹NIKNI Allah, Haren sali imbinag ane uwag oko wa fug teg lahenteg anden siyag ane su roho tirikikon hambolmayap tubusuhun.

¹²Ap sa hahon NINIKNI Allah fahet enekol toho wereg lit At wel turuk lamuhup? At fahet enekol toho werehonen kebunggalem keyon lahuk ulug wenggel harukmu NINIKNI Allahn kalem lahup ke tu ulug hiyag isaruk.

¹³It inindi yuwag toho enebe fano roho weregman eneg unumalikisi unumbusagsi menen oho kinang aru seneg lamuhup.

¹⁴NINIKNI Allahn indimuwen wenggeltuk ane At fahet enekol toho wereg inap eneg hiyag isaruk. Nininggik ahandip toho welamuhuk ulug sali imbibag ane ari it arimano eneg anggul eneptuk.

¹⁵NINIKNI Allahn an fet nasugmu nuyug yebangge elma luhur aruhu fug ulug nilen likiya hupmu At eneg yet teg lahi.

¹⁶NIKNI Allah, an nilaheg toho weregman ap misihen oho let naptuk elehen Haren an halukema numbaharuk lit hindi nasug laruhun.

¹⁷Nakolen sat haruk lahimu an nindi seyap nabin! Asengseng toho welahireg windat nabin!

¹⁸Alem eke hag eke hag nubam atuken nindi anggin toho welahiyon yet niyaruk lit anden siyag ane turuk latikikon obog toho elehap tin.

¹⁹Ap an men seli roho werehon anggolo werehon aruma yet isimin. Iren an fahet ninirim peruk lit nuwabul ulug turuk.

²⁰An siyag aruhuk tohon nahap mapmu naptuk lit windat nabin! Ili og napmisi ulug Hat hapma waharuk lahi.

²¹Nindi piren teg eleg angge fano ane eneg turuk lahi ane ariyen nindi yuwag toho welaruhuken Allahn eneg let napmisi ulug yet hasug lit welahi.

²²Allah, Hat humalikisi Israel inap aruma enesengseng toho weregma windat enebik ma!