Read Angguruk Yali MAZMUR 27 Bible Online

MAZMUR 27 - Angguruk Yali bible

MAZMUR 27

¹Dauren sini yunggultuk latfahon tu: NIKNI Allah, Hat an fahet seleg welahen. Haren an windat naptuk lahenma anden ap sa hahon fahet nakol toho welatmin? Nungge-nungge ubam aruhu rohon ulug fet nasug lahenma ap misig fahet oho nindi yuk toho welahi fug.

²Ap seliyonen an fahet onolok anggolo haruk lit waroho isag nabul ulug turuk halug unuyug salog-malog angge roho mako wamburuk lamuhup.

³Asan hum toho waharuk lit nuwabul ulug waling naptuk halug oho an nakol toho welaruhuk fug. An nibil tog pising ha waharukmu oho nindi yuwag toho welaruhuk.

⁴We alem misig eneg og netep peruk lahiyon NIKNI Allah ubam heng turuk lahiyon tu: An noluk wereg li At ibam mondabi wereg lit likiya hupmu NIKNI Allahn peruk ane fahet wenggeltuk lit At indi fanowon yet haruk laruhuk.

⁵Alem angginon nubam atuk li NIKNI Allahn at ibam hirag naptuk lit fet nasug laruhu. Aren helep unggulmu unduhuk nubahik lahu.

⁶Ap seliyonen waling naptukon arimano apma amuhupmu an palimu unduhuk laruhuk. Ari fahet nahiyeg toho wereg lit At ibamen hubu lahaptuk lit NIKNIYEN let naptisi ulug sini yunggultuk laruhuk.

⁷NIKNI Allah, let nabin ulug nele ine roho heng haptuk lahiyon hindi niyaruk lit nele holmihin!

⁸Haren hele uruk lit, ”An nolohotma wamuhup,” irikin ane hikit toho an holohotma waharuk lahireg

⁹Hat horohole hirag ta fug. Haren anggoloenam let naptuk latikin angge re ketiya an hamingmingangge pet naptuk lit yanggal nabuk fug! An windat naptukon Hat welahenma hinggik kobog niya fug angge miyal niyamihin fug!

¹⁰Nikni men nisinga menen lin naptusa hag toho Haren lin niya fug angge fet nasug laruhun.

¹¹NIKNI Allah, kalem fanowon hiyag nitmihin. Ap seliyonen kahal naptuken kalem pikiron fam hondog napmihin.

¹²Ap seliyonen enele si ane uruk lit il eleha fusul ulug mug niyaruken ininggikmu numbahuk fug.

¹³An kinang tu fam weregma NIKNI Allahn fano ane nubam turuk laruhu ulug noluk toho welahi.

¹⁴NIKNI Allahn fanowap nabuhu ulug hat hindi wirik toho welaruhun! NIKNI Allahn windat nabuhu ulug wenggel haruk laruhun!