Read Angguruk Yali MAZMUR 30 Bible Online

MAZMUR 30 - Angguruk Yali bible

MAZMUR 30

¹Dauren milaltuk latfag asini Allah ibam keron sok husibahon fahet wenggel haruk sambil yunggultuk latfahon tu:

²NIKNI Allah, an apma welatikik ambehen Haren lisoho lahap naptikin ane fahet hunuk palimuwap turuk lahi. An men seli roho wereg inaben an siyag toho welatikikon fahet enehiyeg hahup tohon ulug Haren an let naptikin.

³An NIKNI Allah, anden Hat hubam nele hi roho let nabin irikikmu Haren hihit naptikin.

⁴Haren an ap warehon wereg ambehen hondog naplug lahik waharikin. An war atikikon nin hebeloho nolukap naptikin.

⁵Hit NINIKNI Allahn indi henesug lahebonen sini fam Allah wel turuk lamek! At usa fulu ahun unuk palimuwap turuk lamek!

⁶At ino nit nonoluk wereg li indi nenesugmen eneg wereg. Il misihim eneg nolok ane timin ulug nunumbaharuk. Hupmu uba yako noholug hubet nenehiyehen yunggultuk lahe.

⁷Alem siyahon nubam am fugmu nindi yuwag toho wereg lit, ”Nindi yuk tuk fug angge eneg welaruhuk,” irikik.

⁸Hat NIKNI Allahn hindi nasug lit an helep unggulmu unduhuk nubaharikinmu nine roho unduhuk latikik angge famen Haren hambol yig nutuk latikinmu nakol haruk latikik.

⁹Nindi nakolen Hat an Nikni hubam nele hi roho uruk lit,

¹⁰”War atminmu kinangma sal nabuhubon ari fam Hat onggo nungge hilahun? Ap warehon kinang atukon arimanowen Hat wel habuk teg ano? Allahn indi nenesug ulug ap hiyag isa reg ano?

¹¹NIKNI Allah, an nele hol niyimin! An hindi nasug lit let nabin!” irikik.

¹²Ari irikikmu Haren nindi angginen uba yatuk latikik ane hebel isarikinmu nahiyehen yunggultuk lahi. Fong watuk asum wan teg latikikon nonggoloho naliliyangge yunggulmu wan turukon lahap naptikin.

¹³An nele eleg alep angge famen sini fam wel haptuk lahi. Allah, Hat an NIKNI welahenonen let naptikin ulug fog haptukmen eneg welaruhuk.