Read Angguruk Yali MAZMUR 31 Bible Online

MAZMUR 31 - Angguruk Yali bible

MAZMUR 31

¹Dauren sini milaltuk lit yunggultuk latfahon tu:

²NIKNI Allah, nahap mapmu napmisi ulug Hat hapma waharuk lahi. An siyag aruhuk tohon Hat humalikisi fet nenesug lahenonen windat nabin!

³Hisanggo leho femihinteg hol niyalug folo-folo let napmihin! Hat an fahet helep owik ap seliyon kuk fug tehon hag toho wereg lit nahap siye nabin!

⁴Hat an fahet tem toho helep owik welahen. Haren tam sali inahon hikit toho kebunggalem fanowon hiyag nimin.

⁵An sen nabul ulug hirahoma yebangge yep teberusa ambehen wilip nabik watmihin. Haren eneg an windat nabuk teg lahen.

⁶NIKNI Allah, an nahime Hat hinggikmu emberuk lahi. Haren an numbahuk fug angge fanowap nabuhun.

⁷Haren usangge alem elehon foroho inap fahet nirim peruk lahenma anden we Hat NIKNI Allah hubam wenggel haruk lahi.

⁸An asengseng toho wereg lit sat haruk latikikmu Haren alpal niya fug angge yet niyarikin. Haren hindi niyarikinmu nahiyehen Hat wel haptuk laruhuk.

⁹An ap seliyon ininggikmu numbaharikin fugmu nine roho unduhuk lamag ulug koloma numbahik larikin.

¹⁰NIKNI Allah, an sat haruk lahireg hindi niyimin! Nindi siyahen an nil hik atisimu nebeyet nahimeyet nine eleg atisi.

¹¹Nindi angginen ngesekum turukmen eneg an war atukon horog atuk. Anden siyag ane turuk latikikon ariyen nubam ouk toho wereg lit nine mondabi eleg atuk.

¹²An fahet ninirim peruk inaben inda yako ninggaliyap naptikim an niraham werehonen oho an nele ying naptuk. An numbaliyen nolohotma yuk lagmag urukmu aben an kalemma larukmu yet niyalug enekolen linggik-longgo uruk.

¹³Aben ap warehon fahet enepeleg atuk hag toho an faher oho wenggel niyaruk eleg. Kubag arap toho ilkal isarukon hag atikik.

¹⁴Anden hol harukmen ap anggolowen an fahet enele umung-umung atukmu hol isarikik. Nangginoho wabuhuk ulug enele sahaltuk. An walinggoho wereg lit siyahap nabuk oho reg.

¹⁵Ari rehen anden Hat NIKNI Allahn let napmihin ulug yet hasug lahi. ”Hat eneg an Nikni Allah welahen,” uruk lahi.

¹⁶An nubam teko lahu ane Hat hinggikmu weregma ap seliyon an mug naplug larukon ininggikmuwen taluk nabin!

¹⁷Hat haluke an hamingmingangge yig nutuk lit hindi niyamihinteg windat napmihin.

¹⁸NIKNI Allah, anden Hat hubam nele uruk lahireg siyag amag ulug numbahamihin fug. Hat hele holtuk eleg inap arimano eneg siyag amag! Enele eleg amag ulug ap warehon kinang apma wereg ambeg wambukag.

¹⁹Enembiliken enele si ane il ap unubabut fanowon enebug il laruk ane umbusukag. Enele winik-wonog toho uruk lit hemet turuk ane eleg amag!

²⁰Hat fahet enekol toho wel haptuk inap hindi anggolo enesug lahen. Ili og nenepmisi ulug hapma larukon arimano ap iniline let eneptuk lahen.

²¹Aben enele ying eneptukmu Haren enehap mapmu enesug lahen. Un ane lombohap eneptukmu enehap hirag eneptuk lahen.

²²Ap seliyonen waling nasugmu NIKNI Allahn indi nasug lit aben tuk fug teg ane nubam tehek ulug At wel turuk lahi.

²³Ap arimanowen nuwabul ulug turukmu an nindi nakolen NINIKNI Allahn oho olohotman yanggal naptisi ulug wenggel harikik angge famen anden nele hi roho let nabin ulug heng turukmu hol neyehek.

²⁴NINIKNI Allahn indi henesuhon obog tohowen hebeloho At hinindi reg lamuhup! Ap inindi wirik toho ubam wenggel harukon arimano Allahn wanggi waroho fet enesug laruhu angge famen ap hemet toho turukon indi isa fug angge alem angginon unubam umbuhu.

²⁵NINIKNI Allahn let nenepmisi ulug yet teg lahebon obog tohowen henekol ha fug angge hinindi wirik toho welamuhup!