Read Angguruk Yali MAZMUR 32 Bible Online

MAZMUR 32 - Angguruk Yali bible

MAZMUR 32

¹Dauren ap inindi anggarap enepmin ulug sini yunggultuk latfahon tu: Aben siyag ane turukon Allahn ambolmayap turuk halug enehiyeg toho welamag! Allah ele pisan turuk angge famen Aren map tebeseruk halug inindi se roho welamag!

²Aben tuk fug ane turukon Allahn winahuk fug angge alem unubam emberuk elehon arimano enehiyeg toho welamag! Nenele si ane ul fug perukon arimano inindi se roho welamag!

³Anden siyag ane tirikikon fag toho uk fug angge weregman nubam ouk toho wereg lit likiya hupmu nele kimkim ane uruk latikik.

⁴Ilingge hubanggo Hat hinggiken namig perel naptuk latikinmu mo oloken inggila halo uruk hag toho nine eleg atisi.

⁵Siyag ane anden tirikikon hirahamin fug ulug wenggel harikikteg Hat hele pisan isaruk lit hare ane tirikikon Hat hubam fag toho irikikmu obog toho Haren apmayap tirikin.

⁶Ari fahet ap san Hat fam wenggel harukon alem angginon ubam atukmu Hat hubam sembahyang uruk lamag! Ik fu waharuk lit at ino ha ralug lahu fug.

⁷Hat hapma an hirag atuk lahi. Siyag aruhu rohon ulug windat naptuk lahen. Haren wanggi wat nasug lahenma nahiyeg toho wereg lit wel haptuk lahi.

⁸NIKNI Allahn ele urukon tu, ”Hat lahun ke tu ulug hiyag hutuk lahi. Haren turuk laruhunon fahet komo haptuk lit nolohotma humbaharuk lahi.

⁹Wam kuda indi anggat teg elehon lul peruk ambeg lawag ulug kumbi ililoho walug laruk hag toho hat hubam teko la nowen hindi anggat toho welaruhun.

¹⁰Allah enembol yig utuk inap ouk anggolo unubamap taruk. NINIKNI Allahn fet nenesug peruk inap arimano Aren indi enesug lit walinggoho kilap enesug.

¹¹Allah alukema wereg hinap henehiyeg toho wereg lit NINIKNI Allahn fano ane nunubam tirisi ulug wel turuk lamuhup! Hit obog toho hinindi fanowonen henehiyeg toho sini yunggultuk lamuhup!