Read Angguruk Yali MAZMUR 33 Bible Online

MAZMUR 33 - Angguruk Yali bible

MAZMUR 33

¹Allah alukema wereg hinap, NINIKNI Allah fahet henehiyeg toho welamuhup! Allah ele holtuk hinap, Allah wel turuk ane hit hunubam wereg.

²NINIKNI Allah fahet sini yunggultuk lit pinggong kong turuk lamuhup.

³At fahet sini keron milaltuk lit henehiyehen sililip toho yunggultuk lamuhup.

⁴NINIKNI Allahn ele tem toho hiyag isaruk. Aren sali emberukon hikit toho turuk.

⁵Fano ane turukon men alem pikit toho haltukon men fahet indi reg lit wereg. Aren ap indi enesug ane ariyen kinang atogman atogma keleg teg wereg.

⁶NINIKNI Allahn ele uruk lit pohol wal tibag. At ambilik fam mo pikalem suhal werehap tibag.

⁷Ik amu welamag pibagma sene humon yenggel atfag. Ik kinang apma werehon lahik waruhu rohon ulug sok laroho pilapfag.

⁸Kinang atogman atogma werehonen NINIKNI Allah fahet enekol toho welamuhup. Ap o pumbuk obog tohowen At suwon ulug inindi yuk turuk lamuhup.

⁹At ele famen mun ane man ane teko libag. At ambilik famen obog toho wereg atfag.

¹⁰Ap o pumbuk obog tohowen wenggeltukon NINIKNI Allahn apmayap turuk. Iren tul peruk ane hondo rebeseruk.

¹¹Aren teko lawag peruk ane eleg am fug angge weregman eneg tuhuk perukon hikit toho turuk laruhu.

¹²Ap ununggul unuk san At fahet NINIKNI urukon enehiyeg toho welamag! Aren an numalikisi ulug mumal tarukon arimano inindi se roho welamag!

¹³NINIKNI Allah poholma wereg lit ap obog toho pilap isaruk.

¹⁴Lehoma heriyeg ambehen ap kinangma werehon obog toho fuki roho yet isaruk.

¹⁵It arimano inindi Aren wirim tibag. Mun ane man ane iren turukon At oluk.

¹⁶Ap suwonen numalikisi sehen senehon anggolo werehen palimu aruhuk puk fug. Sehen senehon misihen ninggareg nolok famen seleg toho wilip aruhuk peruk lam fug.

¹⁷Wam kuda fam lahalug tog silimu larukon arimanowen nenembohom ine fam ap seliyon apmayap enebul peruk lamuhup fug.

¹⁸NINIKNI Allah fahet enekol toho werehon arimano At alukema wereg. NINIKNIYEN indi nisaruk laruhu ulug wenggeltukon arimano Aren fet enesug laruhu.

¹⁹It war amuhup tohon ulug let eneptuk lit suburu obok li oho wanggi wat enesug laruhu.

²⁰NINIKNI Allahn ninibil atuk lit nenehap hirag nenebuhu ulug wenggel haruk lahe.

²¹At unuk mondabi fanowonen nit fanowap nenebuhu ulug nenehiyeg toho welahe.

²²NINIKNI Allah, Hat hinggikmu fano welamuhuk peruk lahe ane hikit toho Haren hindi nenesugmen eneg welaruhun.