Read Angguruk Yali MAZMUR 34 Bible Online

MAZMUR 34 - Angguruk Yali bible

MAZMUR 34

¹Dauren Abimelekh orohole ke nenek turuk pukag ulug turukmen Abimelekhen lag ulug yanggalfagma wilip atfareg sini yunggulfahon tu:

²Likiya hupmu nambilik fam NINIKNI Allah wel turuk laruhuk.

³NIKNI Allahn turuk ane fahet an nahiyehen uruk lahiyon ap siyag toho werehonen hol hahupteg enehiyeg hahup.

⁴An men hit menen At eneg suwon ulug unuk palimuwap turuk lamuhuk.

⁵An nakol toho wereg lit NIKNI fam sembahyang urukmu Aren nele hol halug let naptisimu nakol eleg toho welahi.

⁶Ap san At ubam wenggel haruk halug Allahn let turukmu orohole inggali ha fug angge ahiyeg toho welaruhu.

⁷Inilaheg toho werehonen enele hi roho urukon NINIKNI Allahn hol halug asengseng harukon eleg amag ulug let eneptuk.

⁸ NINIKNI Allah fahet enekol toho wereg inap Allah ot malaikat inowen wanggi waroho fet enesug lit windat eneptuk.

⁹NINIKNI Allah fano ulug hininggarehen wal haruk lamek! At uyug alma waharukon arimano enehiyeg toho welamuhup.

¹⁰Hit At umalikisi welahebonen At ele eneg holtuk lamuhup. At fahet enekol toho wereg lit ele holtuk inap mun angge man angge enesehet teg angge obog toho og isaruk.

¹¹Olomene oho suburu obok toho wereg angge famen NINIKNI Allah fam wenggel haruk inap nungge-nungge inilmu eleg laruhu fug.

¹²Hit an numalikisi, NINIKNI Allah fahet henekol toho welamuhuben milal heneptuk lahi. Anden hiyag hisaruk lahiyon holtuk lamek!

¹³Nit nenehiyeg toho eneg weregman amusun toho welamuhuk peruk lahep halug

¹⁴siyag ane nenele si ul fug ulug hininggareg henembilikmu sap teg lamuhup.

¹⁵Siyag ane hik isahupteg fano ane eneg tul peruk lit honori men mangno roho welamuhuben yami ruruk lamuhup.

¹⁶NINIKNI Allah men mangno roho wereg inap Aren yet enesug lit weregma ubam heng turukon fahet isanggo leho feruk angge famen

¹⁷siyag ane turuk inap Allahn anduhun yig isaruk. It war amuhupmu ap misihen oho ununuk uruk lamuhup fug.

¹⁸Ap Allah fam wenggel harukonen enele hi roho ubam urukmu Aren hol isaruk lit it inindi anggin toho werehon eleg amag ulug let eneptuk.

¹⁹NINIKNI Allah mondabi siyag amuhuk peruk inap iniraham wereg lit inibil atuk.

²⁰Fano ane eneg turuk inap alem angginon anggolo unubam atuk angge famen NINIKNI inowen ili og eneptuk lit windat eneptuk.

²¹Enebe abirangge NINIKNI inowen fet enesugmu aben unuwag misig oho fala enebuhup fug.

²²Onolok ane turuk inap siyag ane turukon ariyen war amuhup. Ap Allah ele holtuk inap ninirim perukon arimano alem angginon unubam aruhu.

²³NINIKNI Allahn amingmingangge fanowap eneptukmu At uyug alma waharukon siyag amuhup fug.