Read Angguruk Yali MAZMUR 35 Bible Online

MAZMUR 35 - Angguruk Yali bible

MAZMUR 35

¹Dauren sini yunggultuk latfahon tu: NIKNI Allah, an apmayap nabul ulug turuk inap Haren apmayap enepmihin. An men tog abul ulug waharukon men Haren tog apmihin.

²In atmihinteg sing wan talug tog piyabangge lahabeg lit let nabik watmihin.

³Fit men karog men seneg lit an mug naplug waharukon arimano unusik laruk lit an nubam, ”Anden windat hapmin,” imihin.

⁴An siyahap nabul ulug kahal naptuk inap ininggali hawag ulug Haren waroho apmayap enepmihinmu enekolen linggik-longgo ulusa.

⁵NINIKNI Allah ot malaikat inowen yanggal eneptukmu inggila siyeluwen walug laruk hag toho lalusa.

⁶Malaikat inowen mug eneplug larukmen eneg o hik tegma ilibulun teg keyen lalusa.

⁷Alem elegman an luhur amag ulug kinang habuloho yebangge yep teberusa.

⁸Yep teberusa angge ino enepeleg aruhumu ke ino larukmen ininggareg luhur amuhup.

⁹Luhur amuhup halug NIKNI Allahn windat naptisi ulug nahiyeg haruk laruhuk.

¹⁰An nindi obog tohowen nele uruk lit, ”NIKNI Allah, Hat hahon winon eke wereg eleg. Haren ap inine elehon arimano ap inine werehon ininggikmuwen windat eneptuk lit inilaheg toho werehon arimano it enenggengge hulul ulug turukon ininggikmuwen taluk eneptuk lahen,” uruk laruhuk.

¹¹Ap onolokonen enele si ane uruk lit alem an napelehon nubam lombohap naptuk.

¹²Anden fano ane unubam turuk latikikmen iren siyag ane nubam turukmu yet isaruk lit an nindi fir atisi.

¹³It ouk warukmu nindi siyahen fesi lahaboho wereg lit suburu na fug angge hiyang welatikik. Wereg lit likiya hupmu nindimuwen sembahyang uruk latikik.

¹⁴It fahet nori hag toho wereg ulug nindi isaruk latikik. Amlohowen isinga waregma fong watuk hag toho norohole kunuk toho welatikik.

¹⁵An salog-malog angge roho wat tarukmu yet niyalug an walinggoho luhal arik waharuk lit inda yag naptuk latusa. Ap an napelehonen oho nele ying naptukmen eneg welatusa.

¹⁶Allahn fano peruk ane wenggel ha fug angge an nolohotma wasubag sup isalug nuwatla ulug eneyeg kilit matuk latusa.

¹⁷Nikni, noenam welaruhukmu Haren let nabuk fug angge hilen yet niyarukmen eneg welaruhun? Olomene arimanowen al senggeloho wabuhup tohon ulug windat nabik ma!

¹⁸Windat nabuhun halug anden Hat humalikisi palu atuk ambehen wel haptuk lit sini yunggultuk laruhuk.

¹⁹An seliyap naptuk lit un ane lombohap naptuson arimanowen an inda yag nabuk nowen fet nasug lamin! An nubahet alem elegman ninirim perukon arimanowen siyahap nabul ulug it-it inil humbut turukon eleg amag!

²⁰Ap obog toho men ninindi nenebe mangno roho welamuhuk puk fug angge ap inindi wiyig toho werehon unubahet enele si ane eneg uruk.

²¹Enembilik putuk isalug an nubam suwahal uruk lit, ”Yihi, yihi, haren siyag ane turukmu yet heyehe,” uruk.

²²Ari obog toho nubam turukmu Hat NIKNI Allahn yet isaruk latikin angge re an let nabuk fug angge numbahalug yatma welaruhun fug.

²³Nikni Allah, an ili og napmihinen in amin! Alem nubam werehon hal nabin!

²⁴Allah NIKNI, Haren mun ane man ane alem obog toho haltuk lahenonen ap iniline an nubahet uruk lit, ”At ubam alem wereg eleg,” imihin. Ari roho imihinmu ap arimanowen inda yag naptukon eleg aruhu.

²⁵It inindimuwen wenggel haruk lit, ”Fano anggolo, tuhuk perukuk ane hikit toho hun ino pil esehe,” uhup tohon!

²⁶An siyag toho welahi ane fahet enehiyeg harukon arimano mangno roho siyag atuk lit ininggali hawag! An nalukema palimuwap taruk latuson arimanowen ininggali haruk ane ari sum hag toho wan taruk lamag!

²⁷At ubam alem eleg ane inam aha ulug enehiyeg haruk lamuhubon arimano enele hi roho, ”NINIKNI Allah we tem toho suwon, An namingmingangge inindi yuwag toho welamuhup peruk ane hikit toho tehek,” uruk lamuhup.

²⁸An Allah ubabut fanowonen windat naptisi ulug likiya hupmu wel haptuk laruhuk.