Read Angguruk Yali MAZMUR 36 Bible Online

MAZMUR 36 - Angguruk Yali bible

MAZMUR 36

¹ NINIKNI Allah amingmingangge Dauren sini milaltuk lit yunggultuk latfahon tu:

²Siyag ane inowen ap Allah fahet ninirim perukon unundama ap hag toho ele urukmu ap siyag ane turukon arimano Allah fahet enekol toho wereg eleg.

³Ininggareg enewelwel tubat taruk lit un ane tirikik ulug wenggel ha fug angge siyag ane turukon fahet ninirim peruk eleg.

⁴Inindi anggat toho wenggel halug fano ane turukon embeselug nonolok ane tul peruk lit enele si ane eneg uruk.

⁵Hubanggo nohoruk ambeg yinggig lit nangginoho nonolok ane tuhuk ulug wenggel haruk. Un ke larukon fahet ninirim puk fug angge siyag ane eneg turuk.

⁶NIKNI Allah, Haren ap hindi enesug lahen ane inowen kinang obog toho hondo reg lit poholma laharuk. Haren umbusuk fug angge ap let eneptuk lahen ane ari hina o kema-kema laruk hag toho kinang atogman atogma inam atuk.

⁷Mun ane man ane haltuk lahen ane ino tom yaron ineyon Haren wal tinahon hag toho wereg. Alem obog toho haloho emberuk lahen ane ari ik suwon yenggelehon ap apma wambuk fug tehon hag toho wereg. NIKNI Allah, Haren abet wamet fet enesug lahen.

⁸Haren ap hindi enesug lahenon hag toho winon eke wereg eleg. Inindi yuwag toho welamag ulug nit ap kinangmon haherabulen hondo nenesug lahen.

⁹Mun angge man angge hibam foroho lahenon og nisaruk lahenma nenehum ouk toho naruk lahe. Inindi enehiyeg toho welamag ulug fano ane eneg nunubam turuk lahen.

¹⁰Hat famen onoluk wereg angge obog toho wereg atuk. Hat seleg fanowon welahenonen nit obog toho selehap neneptuk lahen.

¹¹Haren umbusuk fug angge ap Hat hunuk onolukon hindi enesug laruhun. Inindi pikit toho wenggel harukon arimano let eneptukmen eneg welaruhun.

¹²Ininggareg palimuwap taruk inap unuyuhen an sobit niyahup tohon fet nasug laruhun. Ap onolokonen an nibamen yanggal nabuk nowen wanggi wat nasug laruhun.

¹³Yet hemek! Ap onolok ane turukon arimano miyaloho hik isaruken mako wamburukmu nin hebeloho in am fug teg lamuhup.