Read Angguruk Yali MAZMUR 37 Bible Online

MAZMUR 37 - Angguruk Yali bible

MAZMUR 37

¹Dauren sini yunggultuk latfahon tu: Allah ele sobir isaruk lit siyag ane turuk inap famen nungge fahet fano wereg ulug hat hindimu siyag am fug.

²It arimano hoholangge heneko emberukon lilog atlug eleg atuk hag toho folo-folo longgo uhup.

³NINIKNI Allah fam wenggel haruk lit fano ane eneg turuk laruhun halug hibam wereg lit hindi yuwag toho welaruhun.

⁴NIKNI Allah men mangno roho wereg lit nahiyeg toho welaruhuk peruk laruhunmu Aren hindimu peruk ane hikit toho hubam tuhu.

⁵At famen eneg welahi ulug hat hubam wereg ane NINIKNI Allah inggikmu emberuk laruhunmu Aren haloho humbaharuk laruhu.

⁶Hat Allah men mangno roho welahenon ariyen fano ane eneg hubam atukon aben seleg toho yet hawag ulug Allahn inamap tuhu.

⁷Hindi yuwag toho wereg lit fobik NIKNI Allahn fano ane nubam tuhu ulug nangno ruruk laruhun. Nonolok ane eneg tuhuk ulug wenggel haruk inap famen nungge fahet fano wereg ulug hindimu het haruk laruhun fug.

⁸Alem angginon hebeloho hinggareg hubam aruhu rohon it unubahet holok haruk lam fug!

⁹Siyag ane eneg turuk inap arimano mondabi eleg amuhupmu NINIKNI Allah apma welamuhuk peruk inap arimanowen kinang aru seneg lamuhup.

¹⁰We tot welamuhupmu Allah abug uruk inap arimano eleg amuhupmu aben yami eneptuk lit hiyag enebuhup fug.

¹¹Inilaheg toho werehonen kinang aru ngi amuhupteg nit fanik-fano roho welahe ulug enehiyeg haruk lamuhup.

¹²Allah fahet enelmahip toho turuk inaben Allah fam wenggel haruk inap siyag ane unubam tuhuk peruk lit eneyeg kilit matuk angge famen

¹³NINIKNI Allahn it eleg amuhubon horog teg ulug inda yag eneptuk.

¹⁴Ap enengge elehen inine eleg toho werehon unusul ulug Allah ninirim peruk inaben karog leho lit wereg. Ap inindi fanowon unusul ulug sehen fam sap toho wereg angge famen

¹⁵karog ininggarehen tohon fam hak toho wat tahupmu enesehen oho fala roho hik isahup.

¹⁶Allah ninirim peruk inaben enenggengge anggolo forohowon arimano apma regma Allah fam wenggel haruk inaben enenggengge we tor angge fet taluhon palimu reg peruk lamuhup.

¹⁷Allah men seli roho wereg inap NINIKNI Allahn apmayap eneptuk lit At fam wenggel harukon inineyap eneptuk.

¹⁸Allahn peruk ane turuk inap Aren fet enesugmu kinang Aren hiyag isarisiyon mondabi ngi roho welamuhup.

¹⁹Alem angginon eke hag eke hag inam aruhu li it arimano Allahn inggik kobog isahu fug. Suburu obok lahaku halug oho it suburu anggolo naruk lamuhup.

²⁰Allah enembolmaya feseruk inap e owil loloho wamburuk hag toho eleg amuhup. At men seli roho werehon arimano hubu fu roho laruk hag toho longgo uhup.

²¹Allah ninirim peruk inaben aben tohon nin hebeloho og huruhuken og nimin uruk anggeyen mondabi hilaruk. Allah fahet akol toho werehonen indimuwen og isamin peruk ane hikit toho og isaruk.

²²NINIKNI Allahn indi enesug inaben kinang aru seneg lamuhupmu Aren huluwap eneptuk inap eleg amuhup.

²³Ap fano lawag ulug NINIKNI Allahn hondog eneptuk. Allahn kebunggalem fanowon laruk peruk inap Aren inineyap eneptuk.

²⁴Kalemma larukmen fuk toho wat taruk halug NINIKNI Allahn it ininggik sen enesugmu kinangma ying atuk lamuhup fug.

²⁵An nebe kabinimu angge sabalma oho ap Allah fam wenggel harukon misig oho Inikniyen inggik kobog isarukmu yet harikik fug. Umalikisiyen oho suburu heng-heng angge turukmu yet isarikik fug.

²⁶Ap inindi fanowon arimanowen likiya hupmu nindiyen og isamin perukon oho nin hebeloho og numuhuben og isamin perukon oho og isaruk lit weregma umalikisi fano roho su amuhup.

²⁷Siyahon embeselug fanowon eneg turuk laruhun halug haren kinang aru senegman eneg humalikisi fobikon oho welamuhup.

²⁸NINIKNI Allahn fano ane turukon fahet ahiyeg haruk lit At men sebe roho werehon apeleg am fug angge wanggi waroho fet enesugmen eneg welaruhu. Allah ninirim peruk inap unumalikisi mondabi siyag amuhup.

²⁹Allah fam wenggel harukon arimano kinang aru ngi roho mondabi welamuhup.

³⁰Allah fahet enekol toho wereg inap inindi anggat teg lit enele uruk. Allahn peruk ane hikit toho ap unubam hiyag isaruk.

³¹Ninikni Allahn ari-ari turuk lamuhup ulug imbibag ane pisan isa fug angge unundama wenggel haruk lit eneg wereg.

³²Allah ninirim peruk inaben ap unubabut fanowon unusul ulug kahal eneptuk angge famen

³³NINIKNI Allahn ap seliyonen unusukag ulug ininggikmu embeseruk eleg. Unggum kong turuk ambehen alem angginon unubam umbuhup tohon ulug inibil atuk.

³⁴NIKNI Allahn let napmisi ulug yet teg lit Aren peruk ane hikit toho laruk laruhunmu hat kinang aru fam welaruhun ulug hineyap habuhu. Allah ninirim peruk inap eleg atukmu yet isahun.

³⁵Allah men seli roho wereg ahun misihen ebe hemet toho turuk lit[8] e umanggen kinang apma wambulug ebe yat toho laharuk hag toho weregma yet harikik angge famen

³⁶winasul ambeg larikikmu eleg latisi. Yami ririkik angge famen hiyaharikik fug.

³⁷Unubabut fano roho wereg lit Allahn peruk ane eneg turuk inap ke roho welamuhup ulug haren kim isaruk laruhun. Nonori men mangno roho welamuhuk peruk inap fobik mondabi fano welamuhup.

³⁸Siyag ane turuk inap obog toho ininggarehet unumalikisiyet eleg amuhup.

³⁹Allah fam wenggel harukon arimano NINIKNI Allahn let eneptuk. Asengseng toho weregma Aren ili og eneptuk.

⁴⁰Allah men seli roho wereg inaben nunusuhup ulug Allah uyug alma larukmu At it inibil atuk lit windat eneptuk.