Read Angguruk Yali MAZMUR 38 Bible Online

MAZMUR 38 - Angguruk Yali bible

MAZMUR 38

¹Dauren an nubahet wenggel niyimin ulug Allah fahet hubu lahaptuk lit sini yunggultuk latfahon tu:

²NIKNI Allah, Haren an nubahet holok haruk lit hindi inahan haruk lahen angge famen an nuwatuk ane embesemihin! Hat hindi olok toho komo yig num fug!

³Haren tog hirahandog nuwatikinteg hinggik hineyonen hondo nasug lahen.

⁴Anden siyag ane tirikikon fahet holok haruk lit nuwatikinmu nuwag eleg atisireg nebe oho abirangge ouk waruk lahi.

⁵Anden siyag ane tirikikonen kanti lisoho alem mondabi angginon nubam atisimu nine elehen ha ruk fug teg lahi.

⁶Nindi sohu reg lit siyag ane tirikikon fahet nuwatikin ambeg arimano pot yig naptisimu mulenen amben siyag anggolo turuk.

⁷Ouk naptuken nambol simbuk teg lit norohole hilik toho la wam turukmen eneg mo lahik watug ubuk uruk.

⁸An nebe inahan anggolo naptukmu nunggulmuwen tulug nuyugmu fano reg ambeg misig oho wereg eleg.

⁹An nuwag lilibug toho nuwatikinmu al sahaloho lin urukon hag toho welahi. An nindimu aben ngik-ngog turuk hag toho turukmu nele hum toho uruk lahi.

¹⁰Nikni, an nindimu ngesekum turuk latikikon Haren holtikinteg an nindimuwen fano ale ulug wenggel haruk lahiyon Hat holuk.

¹¹Nine eleg atisimu nakolen nindi pong-pong angge ruruk lit nilanggen oho hubun atisi.

¹²An ouk waruk lahiyon fahet ninirim ulug nori nindi enesug lahiyon arimanowen enembol yig nutusa. Nit nununggul unuk misihon famen an numbahalug larusa.

¹³Ap winonen nuwabul ulug yebangge yep turukmu winonen siyag amag ulug un ane lombohap naptuk lit an nabug urukmen eneg hup atug sakan turuk angge famen

¹⁴anden hol isaruk lit nele imin fug ulug isanggowet eleyet lareg ahun hag toho welahi.

¹⁵Isanggo larehonen ele uk fug teg hag toho anden oho ap arimano hebeloho nele hiyag isaruk lahi fug.

¹⁶NIKNI Allah, Haren an let nabuhun ulug nangno ruruk lahi. Hat Nikniyen an nubalma hele hiyag isahun.

¹⁷An nuyug sultuk toho fuk turukmu ap arimanowen yet niyalug an nalukema winik-wonog angge ruhup tohon fet nasug lamin!

¹⁸Likiya hupmu ouk nubam wereg lit mako wambuk hag ane naptuken naliplip toho welahi.

¹⁹Anden siyag ane tirikik ulug fag toho uruk lahi. Alem anggolo nubam werehen nakol toho welahi.

²⁰Alem elegman an fahet ninirim ulug seliyap naptusa inap enebe anggolo wereg.

²¹Anden fano ane yami ruruk lahiyon fahet ninirim ulug an men seli roho wereg. Fano ane unubam turuk lahiyon fahet iren siyag ane fam ayeg wat nutuk.

²²Allah NIKNI, an let nabuk fug angge numbahalug yatma welaruhun fug.

²³Nikni, Haren eneg an windat nabuk teg lahenma folo-folo let nabik ma!