Read Angguruk Yali MAZMUR 39 Bible Online

MAZMUR 39 - Angguruk Yali bible

MAZMUR 39

¹Dauren hun Yedutun milaltuk lit sini yunggultuk latfahon tu:

²Anden turuk laruhukon fahet nubam anggat toho welaruhuk perikik. An nele uruk lit alem nubamap tahuk tohon ulug wenggel harikik. Ap onolokonen hol niyahup tohon ulug nambilikanggen hele fam pug tehon hag toho wereg lit it iniline nele uk fug angge welaruhuk ulug kong toho emberikik.

³Kong toho emberikikon hikit toho nele irikik fug. Nindi se aruhu ulug nele uk fug angge welatikik angge famen nin sebe roho nindi anggin atisi.

⁴Anden mun ane man ane wenggel harukmen eneg nindimu indok ambulpul hag toho ulog tirisimu ketiya an nindimu foroho lahiyon wilipmin perikik.

⁵Perikikteg anden nele uruk lit, ”NIKNI Allah, an noluk welahi ane il horog tehen noenam welaruhukteg war aruhukon fahet hiyag nimin. Hiyag nitmihinmu an ilamna roho welahi ane fahet nindi anggar atmisi.

⁶We tem toho an il misig eneg noluk welaruhuken lal naptik inag. An Hat hilmuwen eleg atuk angge hag toho welahi. Ap kinangmon misihim sat fu isaruk hag toho wereg.

⁷Enehime pingga rurukon folo-folo teng uruk hag toho longgo uruk. Mun ane man ane alem elehon fahet enele ngik-ngog turuk lit yi angge ti angge ininggikmu atukon lahabil laharuk angge famen war amuhukmu ap sa ngi aruhu ulug it enepeleg.

⁸Ari reg angge famen nungge ane nubam aruhu ulug nangno ruruk laruhuk? Nikni Allah, Haren eneg let naptuk laruhun ulug nindi wirik toho wenggel haruk lahi.

⁹Anden alem angginon nubamap tarikikon Haren windat nabik ma! Ap inindi sohuwonen an inda yag nabukag ulug ininggikmu numbahuk fug!

¹⁰Hat famen eneg alem arimano obog toho nubam atisimu an nele nin eke imin fug.

¹¹Hat hinggiken nuwatuk lahen ane ariyen an war am hag ane turuk lahireg nin sebe roho nuwaruhun fug.

¹²Ap ekeyen siyag ane turukon fahet Haren komo rimin ulug alem ubam emberuk lahen. At inowen amusun toho welale perukmen Haren pak yeliyen sum il kong turuk hag toho at war amag ulug kong turuk lahen. We tem toho ap kinangmon misihim sat fu isaruk hag toho wereg.

¹³NIKNI Allah, an numbasi obog toho ap pohon welatfag hag toho an oho Hat halukema ilamna welahi. Ari fahet an nele hi roho uruk lit sembahyang uruk lahiyon Haren holeg lamin! An uba yatuk lahiyon yet niyalug hele eleg angge welam fug!

¹⁴An nebe war aruhukteg mondabi la fugmu nindi nahiyeg toho welaruhuken Hat horohole holok toho kim niyahun fug!