Read Angguruk Yali MAZMUR 40 Bible Online

MAZMUR 40 - Angguruk Yali bible

MAZMUR 40

¹Dauren sini yunggultuk latfahon tu:

²NIKNI Allahn let nabuhu ulug nindi yuwag toho wereg lit nangno ruruk latikikmu Aren an yet niyarisireg nele holtisi.

³An kiling ele yaron fam sabelep wereg ambeg weregman Aren ninggik lisoho helep fam numbahik laharisimu nine roho laruk lahi.

⁴Aren sini keron milal naptisimu Ninikni Allah wel turuk lahi. Anden wel turukmu ap anggolowen yet niyahupteg iren oho NINIKNI Allah fahet enekol haruk lit At ubam wenggel hahup.

⁵Ap san usasum ele si ane uruk angge arimano fahet wenggel ha fug angge ap enebe hemet turuk inap unubam let nabiyek ulug heng enebuk fug angge we NIKNI Allah famen eneg welahi perukon arimano enehiyeg toho welamuhup.

⁶ NIKNI Allah, Haren anggoloenam let neneptuk latikin. Hat hahon winon eke wereg eleg. Haren numalikisi let enebuhuk peruk lit aben tuk fug tehon nunubam eke hag eke hag turuk latikinon anden obog toho uk fug teg lahi.

⁷Suburu Hat hubahet emberukon men wam holohotma yaltukon men fahet Haren nirim peruk lahen. Siyag ane hunubam werehon elehap timinen wam waroho hubu lahaptuk lamuhup ulug hiyag nisarikin fug. An nele holtuk laruhu ulug Haren an nisanggo emberikin.

⁸Anden nele uruk lahiyon tu: Haren perukon suwesingga fam haharehon hikit toho tuhuken wahireg welahi.

⁹Nikni Allah, ari-ari turuk lamuhup ulug imbinahon ino nundama foroho lit nahiyeg toho turuk laruhuk.

¹⁰Hat humalikisi palu roho weregma Allahn windat neneptisi ulug hiyag isaruk lahi. Nambilik laroho welam fug angge wene fanowon aru hiyag isaruk lahiyon Hat holuk.

¹¹Haren fanowap henebuhuk irikin ane ino anden nindimu hirako foroho lahi fug. Haren nit humalikisi hapeleg am fug angge let neneptuk lahenon fahet likiya hupmu hiyag isaruk lahi. Humalikisi palu roho wereg ambehen Haren hindi nenesug lit likiya hupmu let neneptuk lahenon fahet awiya waruk lahi fug.

¹²NIKNI Allah, Haren an hinggik obog niya fug angge hindi nasug lit likiya hupmu let naptuk laruhunmu nindi yuwag toho halukema welaruhuk.

¹³Alem angginon eke hag eke hag nubam atuk lit hondo nasugmu obog toho winahuk fug teg lahi. Anden siyag ane eneg turuk latikikon onggoken alem nubam eneg arik waharuken norohole leko yet ha fug teg lahi. Alem anggolo arimano noruk nunggulmu werehon men wirim teg elehen an nine mondabi eleg atisi.

¹⁴NIKNI, hindi niyimin! Hat folo-folo watmihinteg an windat napmihin.

¹⁵An nuwabul ulug kahal naptuk inap ininggali hahupteg longgo uhup. At siyag toho wereg ulug enehiyeg haruk inap waroho apmayap eneptukmu an nirahamen wilip amuhup.

¹⁶Ap an inda yag naptukon arimano yuk lagmag uruk lit ininggali hahup.

¹⁷Ap Hat yami haptukon obog toho enehiyehen yunggultuk lit Hat wel haptuk lamuhup. Allahn fanowap neneptuk ulug hi haptuk inap arimanowen Hat fahet NINIKNI Allah we tem toho suwon uruk lamuhup.

¹⁸An nine elehen nilaheg toho welahiyon NIKNI Allah, Haren fet nasug lit welahen. Hat fanowap naptuk lahenonen folo-folo let nabik watmihin!