Read Angguruk Yali MAZMUR 41 Bible Online

MAZMUR 41 - Angguruk Yali bible

MAZMUR 41

¹Dauren sini milaltuk lit yunggultuk latfahon tu:

²Ap inilaheg toho werehon fahet wenggel isaruk inap enehiyeg toho welamag! Alem siyahon it unubam atukmu NINIKNI Allahn windat enebuhu.

³Onoluk welamuhup ulug NINIKNI Allahn ili og eneptuk lit ap seliyon ininggikmu umbusuhu fug. Umbusuhu fugmu inindi enehiyeg toho enengginang fam welamuhup.

⁴Ouk unubam werehen nohoruk ambeg yinggig lit eneg weregma NINIKNI Allahn fet enesug lit nin hebeloho fanowap enebuhu.

⁵Ari obog toho wenggel halug an nele uruk lit, ”NIKNI Allah, anden Hat hele sobir isalug siyag ane tirikik. Ari fahet Haren hindi niyaruk lit an hihit nabin!” irikik.

⁶An men seli roho werehonen an nubahet enele uruk lit, ”Nosambil hun ari war aruhumu unuk eleg aruhu?” ulug nabug uruk.

⁷Ap an pen niya waharukon arimano enembiliken enele sibiling-sibiling ane uruk angge famen inindimuwen alem ubam wereg ano ulug yami rul peruk. Inindimu ari peruk lit nenele ambiyeg uruk lahe angge famen an numbahalug wilip atuk lit nabug il laruk.

⁸An fahet ninirim peruk inap arimano palu atug enele sahaltuk lit, ”Nit mangno amulteg at siyahap tulen maniyek!” uruk. Ari ulug enele ahuri ha roho,

⁹”Ouk ap unusurukon ubam atisi. Ap sa ouk ari ubam atuk halug nin hebeloho in aruhu fug,” uruk.

¹⁰An nare nindi reg lahiyon nasuburu naruk ahun inowen oho uyuhen sobit niyaruk.

¹¹NIKNI Allah, ap arimanowen an nubam turukon fahet anden ayeg waroho siyahap enebuhuken Hat hindi niyaruk lit nin hebeloho unduhuk nubahin!

¹²An men seli roho werehonen enele hi roho hun ino apmayap tehe uhup fug halug Allahn indi nasug ulug noluk aruhu.

¹³Anden siyag ane tirikik fugmu Haren let naptuk lit An niraham mondabi welaruhu ulug Hat halukema unduhuk nubahin.

¹⁴Israel ninap NINIKNI Allah wel turukmen eneg welamuhup. Amin! Amin!