Read Angguruk Yali MAZMUR 42 Bible Online

MAZMUR 42 - Angguruk Yali bible

MAZMUR 42

¹Korah inaben ap inindi anggar amag ulug sini milaltuk lit yunggultuk latfahon tu:

²Wam rusa inowen ik nele ulug indi ouk haruk hag toho anden Hat Nikni Allah hubahet oho nindi ouk toho wenggel haruk lahi.

³Noenam welaruhukteg Allah olohotman sembahyang ik lahuk ulug Hat Allah holuk welahenon fahet nindi anggin toho welahi.

⁴Aben Hikni Allah kema wereg ulug kapal niyarukmu likiya hupmu uba yatuk lit nil ahaluwe suburu hag toho naruk lit welahi.

⁵Indam Allah ibam lul ulug ap anggolo ambiyeg laruk lit nenehiyehen yungguloho Allah wel til laruk latukuk ane anden wenggel halug nindi siyag atuk.

⁶Nungge fahet an nindi siyag toho wereg lit yat toho wenggel haruk lahi? Allahn let nabuhu ulug nangno ruruk laruhuk. Fobik Allahn windat naptisi ulug At wel turuk laruhuk.

⁷An welatikik ambehen yatma hik niyarusama ik Yordan eleruk tom Hermon famen wiliptukmu wereg lit nindi anggin toho welahi. Allahn ke roho nubam tuhu ulug At ubam eneg wenggel haruk lahi.

⁸Ik haglabut watuk ambeg welahimu ik fu eke hag eke hag Haren monde fik waharuk lahenma an nemberim ke hondo nabik waharuk.

⁹Ilingge NIKNI Allahn indi nasug lit weregma anden hubanggo sini yunggultuk lit Allah nebe nolukap naptukon ubam sembahyang uruk laruhuk.

¹⁰Allah ili og naptukon ubam nele uruk lahiyon tu: Nungge fahet Haren an og nabuk fug angge numbaharuk lahen? Nungge fahet an men seli roho wereg inaben apmayap naptukmu nindi siyahen uba yatukmen eneg welahi?

¹¹Ap an fahet ninirim peruk inaben nele ying naptuk lit, ’Hikni Allah kema wereg?’ ulug umung niyarukon ino tog nindimu kuluk waroho nuwatukon hag toho wereg.

¹²Nungge fahet an nindi siyag toho wereg lit yat toho wenggel haruk lahi? Allahn let nabuhu ulug nangno ruruk laruhuk. Fobik Allahn windat naptisi ulug At wel turuk laruhuk.