Read Angguruk Yali MAZMUR 44 Bible Online

MAZMUR 44 - Angguruk Yali bible

MAZMUR 44

¹Korah inaben ap inindi anggar amag ulug sini milaltuk lit yunggultuk latfahon tu:

²Allah, amukasi nunumbasi weregma Haren su ane turuk latik inahon fahet niniknisiyen hiyag nisarukmu nit ninisanggowen holtuk latukuk.

³Hat hinggik ineyonen o pumbuk wal-wal welatfahon yanggal eneptuk lit nit nunumbasi yug toho welamuhup ulug e hag toho yag eneptik inag. Ap o pumbuk winamon arimano siyahap eneptuk lit nunumbasi inineyap eneptukmu fano wereg latfag.

⁴It ininggiken enesehen seneko ininggarehen tog aptuk lit kinang ino ilmig tibag fug. We Hat hebe umbagpag til laruk lit hinggik ineyonen it fahet kinang ino ilmig tinag. Haren tem toho it fahet hindi enesug latik inag.

⁵Allah, Hat ap suwon fet nenesug lahenon niren wel haptuk lahe. Haren hun Yakuben ondohowonen ondohowon arimano palimu amuhup ulug inineyap eneptuk lahen.

⁶Hat nit ninibil atukmu ap seliyon apmayap enebuhuk. Hat hunuk fam nunuyuhen sobir isaruk lamuhuk.

⁷Nit nenesehen famen palimu amuhuk peruk lahe fug. Karohen oho windat nenebuk fug teg.

⁸We Haren eneg ap seliyon ininggikmuwen taluk toho og neneptuk lit nit fahet ninirim peruk inap ininggaliyap enebuhun.

⁹Ari fahet niren likiya hupmu Hat Allah wel haptuk lit hunuk palimuwap turuk lamuhuk.

¹⁰Ketiya Haren nit miyaloho hik nisaruk lit nininggaliyap neneptuk latikin. Nit tog abik larukmu Hat nit men ambiyeg larukuk fug.

¹¹Hat nunumbahalug larikinmu nit nenekolen ap seliyon onolohotman linggik-longgo urukmu nenenggengge huhulangge hilarusa.

¹²Haren wam waroho isag taruk hag toho nit ap seliyon ininggikmu nunumbaharuk lit o pumbuk wina ke hik-hak nisaruk latikin.

¹³Nit Hat humalikisi welahe angge famen ap seliyon ayeg waroho og isarikin. Onggo anggolo og numag ulug heng enebuk fug angge saplangge og isarikin.

¹⁴Haren ari roho nunubam turukmu yet nisaruk lit ap o pumbuk walinggoho werehonen nit inda yako nininggaliyap neneptuk.

¹⁵Ununggul kani ruruk lit inda yag enebulen maniyek ulug nenebug uruk.

¹⁶Ap seliyonen nit ayeg waroho apmayap nenebul perukon arimanowen nenebug uruk lit ninindi siyahap neneptuken likiya hupmu nininggaliyen nonorohole kunuk toho welahe.

¹⁸Nit Hat fahet nenepeleg atuk lit Hat men nininggik ahandip toho welamuhuk ulug sali emberukukon suhan isarukuk fug angge famen alem siyahon arimano obog toho nunubam atisi.

¹⁹Niren nenembol yig hutuk lit kalem fanowon Haren hiyag nisarikinon embeselug larukuk fug angge famen

²⁰Haren nit al senggeloho nunusirikinmu o hiken hondo nenesugmu olomene onolokon sehelimu welahe.

²¹Niren Hat Ninikni Allah hunuk nenepeleg atuk lit ap winonen nunumba ulug wel turukon fam sembahyang ul ulug nininggik leho fila halug

²²Hat we pikit toho holuk atep. Ap kinangmonen inindimu hirako forohowon Hat holohotma mapmu reg eleg.

²³Hat hunuk fahet nit nunusuhup tohon ulug likiya hupmu neneliplip toho welahe. Wam domba waroho isag tahuk ulug enebug uruk hag toho nit fahet oho nenebug uruk.

²⁴Ninikni, nungge fahet nohoruk lahen? In amin! Mondabi siyag amag ulug miyaloho hik nisahun fug!

²⁵Nungge fahet horohole saloho hambol yig nisaruk lit ap seliyonen apmayap neneptukmu asengseng toho welahe ane hapeleg atuk?

²⁶Nit ninindi fir atisimu kinangma yinggig lit hebeloho in am fug teg lahe.

²⁷Hat hindi nenesug lahenonen folo-folo windat nenebik ma!