Read Angguruk Yali MAZMUR 45 Bible Online

MAZMUR 45 - Angguruk Yali bible

MAZMUR 45

¹E owil fene sini urukon wirim toho Korah inaben ap inindi anggar amag ulug it-it inindi roho wereg ane fahet sini milaltuk lit yunggultuk latfahon tu:

²Nindi inahan toho wene fanowon eke imin. Nambilikanggen ap indi anggat tehonen suwesingga hahatuk angge hag toho wereg lit ap suwon fahet sini eke imin.

³Hat ap suwon hebe fano reg lahenon hag toho ap winon eke wereg eleg. Hat humalikisi hindi enesug lit hambiliken fano ane eneg unubam uruk lahen. We tem toho Allahn hat hineyap haptukmen eneg wereg.

⁴Hat hahako roho turuk lahenon, haliliyangge ap suwonen lahaptukon wan teg lit namil fam karog pug teg latmihin!

⁵Hat ap suwonen humalikisi hindi enesug lit mun ane man ane fahet hele si ane uk fug angge fano roho haloho emberuk lit ap seliyon obog toho apmayap enebil laruk laruhun. Hat laruk laruhun ambehen hinggik ineyonen hahako roho turukmu yet hiyaruk lit aben hat fahet enekol haruk lamuhup.

⁶Hantog fano roho kiyarehon ap seliyon inindi pik-pulmu pising isahunmu yet hiyahupteg o pumbuk winamon arimano hat hapma amuhup.

⁷Allahn ap suwon welaruhun ulug lahap haptisimu Haren ondohowonen endebuhubon oho lehoma heriyegman eneg welamuhup. Ap suwon uwanggun hat hinggikmu seneg lahenon tem toho uruk ane seneg lahen.

⁸Pikir ane turukon hindi reg lit hare ane turukon haren hirim teg lahen. Hori men ambi roho welatikip angge famen Hikni Allahn hahiyehap haptuk lit ahaluwe hunggulmu hilil haptisireg it sehelimuwen hat palimu unduhuk hubaharisi.

⁹Sum wan teg lahenon obog toho pingga inggila amben men e kami ahap amben men hag toho turukmu hat hibam melei ubahat fam topno roho wirig ambehen hotsiyen pinggong watuk.

¹⁰Ap suwon eneholani hat haliliyangge hag toho walinggoho weregma huhe aliliyangge emas orohole mondabi fanowon lahaboho hat hinggik pikit fil unduhuk.

¹¹Nahaloho, ap suwonen hat og hasug laruhuk peruken anden iminon tu fuki roho holeg lamin: Hat hibam men hotsi howesi obog toho hapeleg aruhumu ap suwon ele eneg holtuk laruhun.

¹²Ap suwonen hat horohole fano reg lahenon helele perukmu nahunen an sen nasug ulug hahiyehen aren peruk ane eneg hikit toho turuk laruhun.

¹³O Tirus inaben fano-fano angge og hirik waharukmu tung inap winon oho haluke yig nisimin ulug hambeg waharuk lamuhup.

¹⁴Ap suwon ahaloho ino aliliyangge mondabi fanowon lahaboho weregma yet homok! Sum hekel emas ili rurukon fam yihikon hesenggengge palehon wan teg lit ap suwon ibam kik waharuk. Kik waharukmu itano otsi hilani malik ombolim larukon men ambiyeg ap suwon iraham hondog eneplug laruk.

¹⁶Ari roho ap suwon ibam kik waharukmu aben enehiyehen enele hi roho uruk lit sini yunggultuk.

¹⁷Hat ap suwonen ap umalik anggolo indag tahunteg numbasi unubalmangge kinang atogman atogma o pumbuk wal taneg werehon sen enesug lamuhup ulug unduhuk unubahakun.

¹⁸Aben hat hunuk wenggel harukmen eneg welamuhup ulug anden sini aru yunggultuk lahi. Ap enele wal-wal urukonen hat wel haptukmen eneg welamuhup.