Read Angguruk Yali MAZMUR 48 Bible Online

MAZMUR 48 - Angguruk Yali bible

MAZMUR 48

¹Korah inaben sini milaltuk lit yunggultuk latfahon tu:

² NINIKNI Allah At eneg suwon wereg. O pumbuk Ninikni Allahn tohon fam At unuk palimu wereg.

³At antom mondabi fanowon yat toho laharuk lit ap kinang atogman atogma werehon inindi enehiyehap eneptuk. Tom Sion yaron ik eleruk fil weregma alem ke At Raja suwon ibam o pumbuk wiroho wereg.

⁴Ibam ine roho wirihon fam Allah apma hirag arik larukon arimano inindi yuwag toho wereg ulug ap onoluk teg.

⁵Ap suwon-suwon palu atusareg tom Sion senerik lul ulug waharusa.

⁶Waharusareg tom ino yet harusareg enekolen lagmag uruk lit linggik-longgo urusa.

⁷Hiyaben malik indag tamin ulug ouken nenek turuk ane ubam atuk hag toho unubam atisimu enekolen unuwag elek-elek angge ruruk latusa.

⁸Siyelu yali filen waharuk lit kou ik ahum pali ke yatma o Tarsis larukon arimano halog turuk hag toho Haren it seliyon arimano ilte-kalte isarikin.

⁹Indam Allahn ine roho turuk latfag ane fahet niren holtuk uwahon hag toho ketiya oho turukmu yet harukuk. NINIKNI Allah pohol ha kinang ha senehon niren wel turuk laheyon ibam pumbukmuwen teko larisi. O ino Allahn ine roho senegma mondabi welaruhu.

¹⁰Nit Hat Allah hibam wereg lit hindi nenesug lahen ane fahet wenggel haruk lahe.

¹¹Hat hunuk kinang atogman atogma aben onoluk teg lit Hat wel haptuk. Hinggik ineyonen mun ane man ane haltuk lahen.

¹²O Sion inaben Hat fahet enehiyeg hawag! Yehuda inaben Haren alem haloho emberuk lahenon fahet yunggultuk lamag!

¹³Tom Sion walinggoho laruk lit elehet huk toho kilabehon fam o yaron wirihon hininggik winag ha lalihip.

¹⁴Elehet yat toho ohowon arimanowet o fanowonet fuki roho kim ha lalihipteg hiren ondohowonen endebuhubon hiyag isaruk lamuhubon tu:

¹⁵Nit Ninikni Allah ari hag toho wereg. At mondabi wereg lit nit hondog neneptukmen eneg welaruhu.