Read Angguruk Yali MAZMUR 49 Bible Online

MAZMUR 49 - Angguruk Yali bible

MAZMUR 49

¹Korah inaben Allah wel turuk asini milaltuk lit yunggultuk latfahon tu:

²Ap o pumbuk obog toho welahebonen hinisanggo leho felug fuki roho holeg lamek!

³Ap suwon-suwon men olma hinap men henenggengge werehonet elehonet fano roho holtuk lamok!

⁴Nindi anggat teg lit nundaman fuki roho wenggel haruk lahi ane eneg uruk latmin.

⁵Allahn wirimangge fam hiyag nutukmu hol halug anden pinggong watuk lit seleg toho hiyag hisaruk latmin.

⁶Ap seliyonen nuwabul ulug waling nasugmu nakol toho welahi fug.

⁷Iren enenggengge anggolo forohowon fam eneg wenggel haruk lit tung ninap welahe ulug enewelwel taruk.

⁸Ap misihen oho nare oluk welamag ulug Allah onggo og um fug teg. Inggareg fahet oho onggo wa fug teg.

⁹An war am fug angge mondabi noluk welaruhuk ulug onggo warukon mondabi palimu rehen mun angge man angge Allah og etlepma oho wirim alep fug.

¹¹Ap obog tohowen yet harukon tu: Inindi anggat teg inap oho war atuk, enepeleg inap men sohu-sohu ane ruruk inap men oho war atuk lit enenggengge lin isarukon arimano ap winon ngi atuk.

¹²Onoluk wereg li kinang anggolo foroho lit wereg angge famen fobik war atuk halug ap warehon sal eneptuk ambeg it inibam yug aruhumu mondabi welamuhup.

¹³Tung inap mondabi welamuhup puk fug. Ir oho wam war atuk hag toho war atuk lamuhup.

¹⁴Nininggareg ninine fam nonoluk welamuhuk ulug wenggel haruk lit ininggarehen uruk ane fahet enewelwel taruk inap fobik welamuhup ane yet enesug lamek!

¹⁵Wam domba hag toho war atuk ambeg larukmu sok foroho ahunen it fet enesug laruhu. It inibam fanowon yatma weregma enebe folo-folo filik amuhup.

¹⁶An eneg Allahn ap warehon wereg ambehen windat nabuhu.

¹⁷Ap misihen anggengge anggolo roho kilabik kurukmu yet halug hakol ha fug!

¹⁸Ap ino war atuk lit anggengge arimanowet ap warehon sal eneptuk ambeg wambuhu fug.

¹⁹At ino oluk wereg lit fano welahi ulug awelwel tarukmu ap winonen oho fano wereg ulug wel turuk angge famen

²⁰umbasi wereg ambeg wambuhureg mondabi hik teg ambeg welaruhu.

²¹Tung inap mondabi welamuhup puk fug. Ir oho wam war atuk hag toho war atuk lamuhup.