Read Angguruk Yali MAZMUR 5 Bible Online

MAZMUR 5 - Angguruk Yali bible

MAZMUR 5

¹Dauren sini milaloho puhuli watuk lit yunggultuk latfahon tu:

²NIKNI Allah, anden Hat hubam nele urukmu hol niyimin! Anden nele sat nim-nim uruk lahiyon holeg lamin!

³Nikni, Hat suwon an fet nasug lahenon, anden nele hi roho let nabin urukmu alpal niya fug. We Hat hubam eneg sembahyang uruk lahi.

⁴O sakan turukmu an nele hol niyamihin. Likiyanet an nubam wereg ane Hat holohotma emberuk lit Haren hebeloho hele hiyag nitmihin ulug yet hasug lahi.

⁵Haren ap siyag ane turukon fahet nirim peruk lahen. Onolok ane turukon arimano Hat holohotma wam fug teg.

⁶Winik-wonog angge rurukon arimano Anden yet isamin fug peruk lahen. Siyag ane til-wil norukon obog toho fahet Haren nambit ulug hambol yig isaruk lahen.

⁷Enele si ane uruk inap arimano longgo ukag ulug siyahap eneptuk lahen. Ap inindi ninap eneptuk lit enemep hinang eneptuk inap yet isalug hindi siyag atuk.

⁸We an eneg hindi anggolo niyaruk lahenma Hat hibam kuk teg lahi. Hat fahet nakol toho wenggel haruk lahireg hibam fil naluke yihik lit nelenggen fam kunuk toho sembahyang uruk lahi.

⁹ NIKNI Allah, aben an fahet ninirim peruken an nibil amin! Namu la fug teg lahireg Haren fano lawag peruk lahen abunggalem pikit toho yag nitmihin!

¹⁰Ap arimano inindimuwen onolok ane wenggel haruk lit enembilik fam enele si ane eneg uruk. Enembilik anggen handuhal teg lit enenggolobag ele ap waroho kilaptuk ambeg hag toho wereg.

¹¹Allah, iren siyag ane turukon ari Haren lisoho ininggareg unubam lombohap enepmihin. Iren ap apmayap enebul perukmen enemu mako wambukag. Ap arimanowen alem eke hag eke hag turuk lit Hat hele ying haptuken miyaloho hik isamihin.

¹²Allahn hirag napmisi ulug hapma larukon obog toho enehiyeg toho welamuhup. Hat inindi hiyarukon obog tohowen Allahn wanggi wat nenesug ulug enehiyehen sini yunggultukmen eneg welamuhup.

¹³Hat fam eneg wenggel harukon arimano Haren inineyap eneptuk lahen. Haren hindi isaruk lit enehap hirag eneptuk lahen.