Read Angguruk Yali MAZMUR 50 Bible Online

MAZMUR 50 - Angguruk Yali bible

MAZMUR 50

¹Hun Asaf inowen sini milaltuk lit yunggultuk latfahon tu: Allah ineyon NINIKNI inowen ele hum toho urukmu kinang mo lahik waharuk ambehen ubuk uruk ambeg werehon obog tohowen holtuk.

²Tom Sion mondabi fanowon famen Allah ebe umbagpag toho inam atuk.

³Ninikni Allahn nele imin ulug waharukmu olohotma indok nil larikim At walinggoho siyelu ine roho fu ruruk.

⁴An numalikisi alem unubam werehon haloho embemin ulug pohol filet kinang filet ele ine roho uruk lit,

⁵”An nubam wenggel niyarukon arimano nambeg wamusan hondog eneplug maniyek! Iren wam waroho hubu lahaptuk lit Allah men nininggik ahandip toho welamuhuk ulug sali emberusa,” uruk.

⁶Allahn mun ane man ane fano haltuk ulug poholen fag turuk. At amuwen alem umalikisi unubam werehon haloho embemisi.

⁷”Hit Israel hinap An numalikisi welahebonen An nele iminon holeg lamek! Hit hunubam suwahal imin. Hit Hinikni Allah An welahi.

⁸Hiren An nubahet wam watuk lahebon fahet pet heneptuk lahi fug. Likiya hupmu An nolohotma wam waroho hubu lahaptuk lahep angge famen

⁹wam sapi hiren foroho lahebonet kambing yuhambukon endetuk lahebonet saplangge og nutuk lahep.

¹⁰Wam pak mene ohimu werehonet tom teng-teng angge werehon fene larukonet An ngi reg lahi.

¹¹Suwe tom pali ke lam-lam larukon obog toho An noluk teg lahi. Anggen ke lebe ruruk angge werehon arimano oho seneg lahi.

¹²Kinang men mun angge man angge kinangma werehon obog toho An ngi reg lahireg suburu obok toho welale halug oho hiyag hetle fug.

¹³Allahn wam sapi unu men kambing amep men naruk peruk lahen ano?

¹⁴An wel naptuk lit Ninikni ulug napma umbuk hahon emberuk laruhun. Hat palimu welahenon og huruhuk irikinon hikirap turuk laruhun.

¹⁵Hat asengseng toho welaruhun li hele hi roho An nubam sembahyang irikim Anden hat windat haptukmu haren An wel naptuk laruhun.”

¹⁶Allah fahet ninirim perukon unubam Aren ele uruk lit, ”Anden tu men ari men turuk lamuhup ulug numalikisi komo eneptik iyahon arimano haren saplangge uruk lahen. An men nininggik ahandip toho welamuhuk ulug unubam sali emberik iyahon ino hambilik fam uk fug!

¹⁷Komo fahet haren nirim peruk lit An nele uruk lahiyon hambolmaya feseruk lahen.

¹⁸Aben tohon hirag taruk ahun eke yet halug at ubam nare uruk lahen. Ap unuhesi pal tarukon men hininggik ahandip toho welahep.

¹⁹Hambilikanggenma un ane lombog tegma hambilikmuwen hele siyahon eneg wiliptuk lahen.

²⁰Hare abug il laruk lit hinisinga misihen indag henesuhon famen lukuram sipuk toho pet turuk lahen.

²¹Haren ari hag toho turuk lahenon fahet Allahn ele uk fug angge welaruhu peruk lahen ano? Allah an men wirim teg ulug wenggel haruk lahen ano? Anden hat komo yig hutuk lit alem hubam werehon inamap timin.

²²An Allah nubahet henepeleg atikip hinaben Anden uruk lahiyon ari fuki roho holeg lamek! Anden hit al senggeloho hunusurukmu ap misihen oho windat henebuk fug teg laruhu rohon!

²³An wel naptuk lit Ninikni ulug napma umbuk hahon emberukon arimanowen An palimuwap naptuk. Kalem pikiron larukon arimano An Allahn fanowap eneptukmu inilen yet niyahup,” uruk.