Read Angguruk Yali MAZMUR 51 Bible Online

MAZMUR 51 - Angguruk Yali bible

MAZMUR 51

¹Dauren Batsyeba pal tibagma Allah amingmingangge nabi Natan inowen komo rik libagma sembahyang imin ulug sini milaltuk lit yunggulfahon tu:

³Nikni Allah, likiya hupmu ap hindi enesug lahenonen an oho hindi nasug laruhun. Hat hindi fanowonen siyag ane tirikikon apmayap tuhun.

⁴Siyag ane nubam werehon obog toho umag nabuhun, nindi siyahon puhun nabuhun.

⁵Siyag ane tirikikon fahet wenggel haruk lit welahi. Hare ane tirikikon likiya hupmu noluk toho welahi.

⁶Nikni, we Hat hindi siyahap haptikik. Haren tuk fug teg peruk lahenon turuk latikik. Alem nubam embemin peruk lahenon fano nubam umbuhun. Huwaruhuk pehenon oho fano nuwaruhun.

⁷Siyag ane turuk nahun nisinga ahummu atik iyareg ketiya oho siyag ane eneg turuk lahi.

⁸Unundaman tem toho perukon arimano hindi enesug lit welahen. Nindi anggar amag ulug Haren peruk lahen ane hiyag nuruhun.

⁹Malik musan fam sabul ho eneptuk latfag hag toho siyahon nubam werehon ho nabuhun. Tom ayeg umbagpag turuk hag toho nebe umbagpag turuk laruhuken umag nabuhun.

¹⁰Hat humalikisiyen enehiyeg toho yunggultukmu an oho holuhuken nindi seyap nabuhun. Nuwag fala roho nuwatikin angge famen nahiyeg haruk laruhuken nin fanowap nabuhun.

¹¹Anden siyag ane tirikikon hambolmaya fusuhun. Hare ane turuk lahiyon Haren elehap tuhun.

¹²Allah Nikni, Haren nindi keron fanowon wal nabuhun. Hat hubam wirik toho wenggel hiyaruk laruhuken nubabut keron og nuruhun.

¹³Haluke fil welahiyon hambol fil hik niya fug. Hat hahime fanowon an nubam weregma hilak wam fug.

¹⁴Haren hebeloho let naptukmu an nahiyeg toho welaruhuk. Nasukun fanowap nabuhunmu Hat hele holtuk laruhuk.

¹⁵Kebunggalem fanowon pisan isalug larukon suhuloho Hat hambeg wamuhuben anden ke fanowon hiyag isaruk laruhuk.

¹⁶Allah nikni, an war aruhuk tohon Hat nibil atuk lit let nabuhun. Let nabuhunmu Allahn fanowap naptisi ulug nahiyeg toho ap inil fam wel haptuk laruhuk.

¹⁷Nikni, nele ine roho wel haptuk laruhuken nambilik ineyap nabuhun.

¹⁸Hat holohotma wam esetukon fahet hahiyeg haruk lahen fug. Anden wam hubahet waroho yaleyon fahet oho fano pelen fug.

¹⁹Nambiken tirikik ulug Hat hapma kunuk toho werehon ino wam amben fanowon hag toho wereg peruk lahen. Siyag ane tirikik ulug inindi anggin toho wenggel harukon fahet Haren siyag peruk lahen fug.

²⁰O Sion siyahap turuson ino nin fanowap tuhun. Elehet o Yerusalem walinggoho ohowon halog turuson ino nin suhuloho wiruhun.

²¹Wiruhun halug Haren sali imbinahon hikit toho wam abirangge waroho yaltuk lamuhupmu wam sapi abon eke Hat fahet hubu lahaptuk ambeg waroho yaltuk lamuhup.