Read Angguruk Yali MAZMUR 52 Bible Online

MAZMUR 52 - Angguruk Yali bible

MAZMUR 52

¹Hun Daud ino Ahimelekh ibam larisi ulug o Edom ahun Doeg inowen ap suwon Saul ambeg huruwe libag li Dauren ap inindi anggar amag ulug sini milaltuk lit yunggultuk latfahon tu:

³Nungge fahet hat hahako roho turuk lahenonen nolok nahun welahi ulug hawelwel taruk lahen? Allahn likiya hupmu an wanggi waroho fet nasug.

⁴Ap siyahap enepmin ulug wenggel haruk lit hele si ane eneg uruk lahen. Hambilikanggen karog olokon hag toho wereg.

⁵Siyahon fahet hindi reg lit fanowon fahet hirim haruk lahen. Enele si ane urukon fano, tem toho urukon siyag peruk lahen.

⁶Un ane uruk lahen hahunen ap pamongge unusuruk lahenon fahet hindi haruk lahen.

⁷Ari fahet Allahn hat mondabi siyahap habuhu. Hat sen habuhureg hibamen lisoho hik hiyaruk lit ap onolukon kinang tu fam werehon enesehelimuwen elehap habuhu.

⁸Elehap haptukmu yet hasug lit ap fano ane turukon arimanowen enekol haruk lamuhup. Iren hat inda yako habug uruk lit,

⁹”Allah apma hirag atuk eleg ahun aru yet hemek! Olok ane eneg turukon ariyen ineyap taruk lit nanggengge anggolo werehen nindi yuwag toho welahi peruk latisi ahun aru,” uruk lamuhup.

¹⁰E zaitun inggila yum turukon Allah ibam iraham werehon hag toho an wereg lit Allahn indi niyarukmen eneg welaruhuk ulug wenggel haruk lahi.

¹¹Hat Allahn an nubam turuk lahenon fahet anden Hat wel haptukmen eneg welaruhuk. Allah unuk fano wereg ulug Hat humalikisi hindi enesug lahenon onolohotman palimuwap haptuk laruhuk.