Read Angguruk Yali MAZMUR 55 Bible Online

MAZMUR 55 - Angguruk Yali bible

MAZMUR 55

¹Daud inowen ap inindi anggar amag ulug sini milaloho pinggong watuk lit yunggultuk latfahon tu:

²Nikni Allah, anden sembahyang uruk lahiyon aru holeg lamin! Anden let nabik ma urukmu hisanggo labuk fug angge hol niyimin!

³Hol niyamihinteg hele hebeloho hiyag nitmihin! An nindi anggin toho wenggel haruk lit nonghong uruk lahi.

⁴Allah enembol yig utug an men seli roho wereg inaben enele ngik-ngog uruk lit nele ying naptuk. An nuwabul ulug enehummu het-pet haruk lit alem angginon eke hag eke hag nubam emberuk.

⁵War atmin ulug nakolen namelmel haruk lit nindi pong-pong angge ruruk.

⁶Nakolen yuk lagmag uruk lit nuwag elek-elek angge ruruk.

⁷An nindimuwen wenggel haruk lit, ”An suwe yalma aherabul lam-lam laruk hag toho lelereg kel taruk ambeg leleman fano.

⁸Longgo imin ulug lekma yat toho lelereg welale.

⁹Siyelu ineyonen aplohok hum toho fu ruruk lit nuwabuk nowen folo-folo hirag arik lele,” perikik.

¹⁰Nit ninibam pumbukmu aben suwahal uruk lit unusil larukmu yet isaruk latikik. Ari fahet, Nikni Allah, it arimano enele ninap enebin!

¹¹Unukoho men hubanggo men it elehet emberimu lahalug ninibam pumbuk aru walinggoho laruk. O pumbuk aru sehelimu alem angginon eke hag eke hag teko larukmu

¹²o silimuwen ap enele ying eneptuk lit apmayap eneptuk ane ariyen keleg tegma mun ane man ane siyag atuk.

¹³Ap seliyon ekeyen nele ying naplep halug an nindi imbik wambele. An fahet nirim perukon ekeyen ele hemet toho uruk lit an apmayap naplep halug an hirag arik lele angge famen

¹⁴hat an nare, an men wirim tohon welahen. Nit-nit ninindi roho wereg lit suburu kuroho naruk latukuk.

¹⁵An men hat men nenehiyeg toho wereg lit nenele uruk latukuk. Ap luhaloho Allah ibam larukmu nir oho laruk latukuk.

¹⁶An men seli roho wereg inap inindimuwen siyag ane eneg wenggel harukmu inibam onolok aneyen keleg teg. Ari fahet it war amul fug perukmen ap warehon wereg ambeg wamburuk lit war amag!

¹⁷Anden nele hi roho NINIKNI Allah ubam urukmu Aren let nabuhu.

¹⁸Likiya unukoho hubanggo an nindi angginen ngesekum turukmu Aren hol niyaruk.

¹⁹Ap anggolowen an nuwabul ulug waharukon ininggikmuwen Aren tel nabuhumu nindi yuwag toho welaruhuk.

²⁰An men seli roho werehon arimano inindi nin am fug angge Allah fahet enekol haruk eleg. Ari fahet Allah indamen tulug ketiya oho lehoma heriyehon inowen an nele hol niyaruk lit ap seliyon arimano apmayap enebuhu.

²¹An nare inowen nininggik ahandip toho welamuhuk ulug ori unubam sali emberisiyon ino sobir isaruk.

²²Ambilikmuwen wilip atukon men sak amug unduk fanowon men wirim teg angge famen ap unusimin ulug ele uruk. Wam si men ambi reg angge famen karog ap unusurukon hag toho wereg.

²³Hat hindi anggin toho welahenon NINIKNI Allah inggikmu embemihinmu Aren fet hasug laruhu. At ele holtukon arimano mako wambuhup tohon ulug yet enesugmen eneg welaruhu.

²⁴Ap enele ying eneptuk lit unusil larukon arimano enebe kabinimu Hat Allahn ap warehon sal eneptuk ambeg hik isahun. Anden Hat hubam eneg wenggel hiyaruk laruhuk.