Read Angguruk Yali MAZMUR 56 Bible Online

MAZMUR 56 - Angguruk Yali bible

MAZMUR 56

¹Filistin inaben hun Daud o Gat inowen senetfagma suwe yalma e sahi fene yatma werehon fahet sini urukon wirim toho Dauren milaltuk lit yunggultuk latfahon tu:

²Nikni Allah, hindi niyimin! Likiya hupmu ap seliyonen an nuwabul ulug kahal nasug.

³Liliyim-laliyim enebe anggolowen an men yik aptuk. Inindimu winik-wonog angge ruruk lit unuyuhen sobit niyaruk.

⁴An nakol toho wereg li Hat hubam wenggel haruk lahi.

⁵Allahn ele fano urukon fahet anden At wel turuk lahi. At ubam wenggel haruk lit nakol eleg toho welahi. Ap misihen oho nungge-nungge nubam tuk fug teg.

⁶Likiya famen tulug hubanggo an men seli roho wereg inaben anden uruk lahiyon hebel-pebel isaruk. It inindimuwen an fahet siyahap tila peruk ane eneg wenggel haruk.

⁷An o kema-kema laruk lahimu nuwabul ulug hirahoma palu atug kahal nasug.

⁸Iren siyag ane turuk angge famen alem angginon unubam am fug angge welamuhup ano? Nikni Allah, Hat holok haruk ane it unubam hik isa wambin!

⁹An nindi nonghong uruken likiya hupmu la wam turuk latikikon arimano Haren winag haruk latikin. Nilmuwen uba wilip atukon Hat hanggubag fam hinanggoho foroho laruhun. Alem arimano obog toho Haren suwesingga fam haharoho emberuk lahen ane an noluk.

¹⁰An nele hi roho Hat hubam uhuk sambil ap seliyon arimano an numbahalug lahup. Allahn an we tem toho let naptuk ulug noluk atisi.

¹¹Allahn ele fano urukon fahet anden At wel turuk lahi. Wene fanowon fahet NINIKNI Allah fog turuk lahi.

¹²Allah ubam wenggel haruk lit nakol eleg toho welahi. Ap misihen oho nungge-nungge nubam tuk fug teg.

¹³Anden Hat Allah og huruhuk ulug sali emberikikon napeleg am fug angge og huruhuk. Nikni ulug wam eke waroho hubu lahabuhuk.

¹⁴An nuyug salog-malog angge roho fuk tuhu rohon ulug Haren ninggik sen naptikin. War ale angge famen Haren windat naptikinmu an ap onolukon sehelimu welahi. O seleg fanowon yet haruk lit Hat Allah holohotma laruk lahi.