Read Angguruk Yali MAZMUR 57 Bible Online

MAZMUR 57 - Angguruk Yali bible

MAZMUR 57

¹Saulen nuwaruhu rohon ulug Daud inowen owik elma hirag arik libareg siyahap tuk fug ulug sini urukon wirim toho milaltuk lit yunggultuk latfahon tu:

²Hindi niyimin, Nikni Allah, hindi niyimin! Nindi yuwag toho welatminen hambeg waharuk lahi. Haherabulen hondo nasugmu an Hat hapma weregman eneg an siyahap nabul ulug waharukon arimano longgo ulusa.

³Allah palimuwon an nibil atukon ubam nele hi roho uruk lahi.

⁴Poholman an windat naptukon eke monde fik watmisireg ap unuyuhen an sobit niyarukon arimano apmayap enepmisi. Allahn an inggik kobog niya fug angge indi nasug latmisi.

⁵An olomene ap narukon sehelimu yinggig lahi. Eneyeg minggin tog hag tegma ambilikanggen karog olokon hag toho wereg.

⁶Nikni Allah, in atmihinteg pohol pali fil lahin! Hat hebe umbagpag turuk lahenonen kinang atogman atogma hondo reg latmihin.

⁷An sapna elma kukag ulug kahal nasuhen inel-hanel uruk lahi. An mako wambukag ulug kinang habuloho yebangge yep teberusa angge famen ininggareg luhur atusa.

⁸Nikni Allah, an nindi yuwag ahama sini fam Hat wel haptuk latmin.

⁹An nindi in amin! Pinggong men puhuli men in amiyek! O sakan tukag ulug mo elel hamin.

¹⁰Ap o pumbuk kema-kema werehon onolohotman sini yunggultuk latmin. Ap obog tohowen holukag ulug anden Hat Nikni wel hapmin.

¹¹Haren ap hindi enesug lahen ane inowen kinang obog toho hondo reg lit poholma laharuk. Haren hinggik kobog isa fug angge ap let eneptuk lahen ane ari hina o kema-kema laruk hag toho kinang atogman atogma inam atuk.

¹²Nikni Allah, in atmihinteg pohol pali fil lahin! Hat hebe umbagpag turuk lahenonen kinang atogman atogma hondo reg latmihin.