Read Angguruk Yali MAZMUR 58 Bible Online

MAZMUR 58 - Angguruk Yali bible

MAZMUR 58

¹Siyahap tuk fug ulug sini urukon wirim toho Dauren milaltuk lit yunggultuk latfahon tu:

²Hit hinine roho welahebon, alem hunumalikisi unubam werehon hiren we tem toho fano haloho emberuk lahep ano?

³Hinindimuwen ap siyahap enebul ulug wenggel haruk lit hininggiken kinang atogman atogma honolok ane til laruk lahep.

⁴Ap unubabut siyahon arimano indag atuk sambilen kalem pikiron embeselug enele si ane eneg uruk.

⁵Pisanggo olokon hag toho wereg lit ap unusil larukmen eneg wereg. Hukalo ap unusurukon aben lukuram sipuk toho yanggal eneptukmu isanggo larehen holuk fug angge ap fato eneptuk hag toho iren oho ari turuk.

⁷NIKNI Allah, olomene arimano iniyahunde sengge roho unusuruk lit eneyeg lilibug toho hik isin.

⁸Ik firig atuk hag toho it arimano oho longgo ukag! Tog pising tul ulug turukmen he ruruk lamag!

⁹Sohobanggen filik turukon hag toho it arimano oho eleg amuhup. Malik isinga ahummuwen hog turuk lit o seleg yet haruk elehon hag toho welamag!

¹⁰Suburu wirabul ulug ket indokma imbik kurukmen siyelu waharuk lit suburu olukonet indokma wirahowonet fu roho walug lamisi.

¹¹It onolok ane turukon arimano ayeg waroho unusurukmu Allah ele holtuk inaben yet isahupteg enehiyeg haruk lamuhup. It unusuhubon enemep ik hag toho yenggel aruhumu it unubabut fanowon mep yenggeleg ke unuyuhen sobit-sobit laruk lamuhup.

¹²Ari roho turukmu ap winonen yet hahupteg enele uruk lit, ”Ap Allah ele holtukon arimanowen onggo hilaruk lamuhup. Kinang tu fam alem obog toho fano haltuk ahun we tem toho Allah eneg wereg,” uruk lamuhup.