Read Angguruk Yali MAZMUR 59 Bible Online

MAZMUR 59 - Angguruk Yali bible

MAZMUR 59

¹Saulen otsi mon enepfagma Daud ibam iraham in arik libareg at wabul ulug kahaleg lit weregma siyahap tuk fug ulug sini urukon wirim toho Dauren milaltuk lit yunggultuk latfahon tu:

²Nikni Allah, ap seliyonen an nuwabul ulug turukmu it ininggikmuwen windat nabik ma! An nahap siye napmihin.

³Onolok ane turuk lit ap unusil larukon ininggikmuwen an tel napmihin.

⁴NIKNI Allah, anden Hat hele embeseruk lit Haren nirim peruk lahenon turuk latikik fug angge famen ap seliyonen enehako roho turuk lit an nuwabul ulug kahal nasug.

⁵Anden siyag ane turuk latikik fug angge famen iren an men tog abul ulug pupu angge waharuk. It yet isamihinen an niraham watmihin!

⁶NIKNI Allah kinang ha pohol ha seneg lit nit Israel ninap Ninikni welahenon, ap o pumbuk obog tohowen siyag ane turukon fahet alem angginon unubam embemihinen in amin! Enele si ane uruk lit onolok ane turukon arimano hindi isa fug!

⁷O hup atukmu it seliyon arimano nin hebeloho waharuk lit mene hilak turukon hag toho enele ngik-ngog til o pumbuk walinggoho laruk.

⁸Enembilikanggen karog olokon hag toho wereg lit aben hol nisaruk eleg ulug it enebug il laruk.

⁹Hat NIKNI Allahn ap o pumbuk obog toho seli roho werehon fahet inda yatuk lit ininggaliyap eneptuk lahen.

¹⁰Hat hineyon hapma timi arik laruk lahi. Hat hubam eneg wenggel hiyaruk lahi.

¹¹Nikni Allah, haren hinggik kobog niya fug angge an nibil arik watmihinmu ap seliyon arimano nilen pilap isamin.

¹²Nikni, Hat tog piyabangge hag toho wereg lit nenehap mapmu nenesug lahenonen ap seliyon arimano folo-folo unusuk fug! Haren an nori unubam alem angginon emberuk laruhunon fahet enepeleg aruhu rohon it seliyon arimano onoluk welamuhup angge famen Hat hinggik ineyonen hik-hak isahunmu mako wambuhup.

¹³Iren enele siyag toho uruk lit Hat hele ying haptuk. Winik-wonog angge ruruk lit yebangge yep tarukon elma ininggareg luhur amag! Enele si ane uruk lit an lukuram sipuk toho pet naptukon fahet

¹⁴holok haruk lit elehap enebin! Mondabi elehap eneptukmu ap kinang atogman atogma werehonen Hat yet hiyaruk lit Allahn umalikisi Yakuben ondohowonen ondohowon arimano fet enesug ulug onoluk aruhu.

¹⁵O hup atukmu it seliyon arimano nin hebeloho waharuk lit meneyen hilak turuk hag toho enele ngik-ngog til o pumbuk walinggoho laruk.

¹⁶Naruk angge yami ril laruk lit suburu oboken enele kuwa ruruk angge famen

¹⁷anden Allah ine wereg ulug sini fam Hat wel haptuk laruhuk. O sakan turukmu nahiyehen sini uruk lit Allahn indi nasug ulug yunggultuk laruhuk. An asengseng toho wereg li Hat hineyon hapma yuwag arik waharukmu Haren nahap mapmu nasug lahen.

¹⁸Haren an nineyap naptuk lahenma anden sini fam wel haptuk laruhuk. We tem toho Allahn an inggik kobog nubahuk fug angge wanggi waroho fet nasug.