Read Angguruk Yali MAZMUR 62 Bible Online

MAZMUR 62 - Angguruk Yali bible

MAZMUR 62

¹Hun Yedutun inowen sini uruk ane roho Dauren sini milaltuk lit yunggultuk latfahon tu:

²Allahn eneg an let napmisi ulug yet teg lit nindi yuwag toho welahi.

³At eneg an nubahet helep ubule hag toho wereg, Aren eneg an ili og naptuk. At o yaron uwag ineyon hag toho weregma an nindi yuk turuk laruhu fug.

⁴Noenam welamuhupteg hit obog tohowen an al senggeloho nuwabul ulug turuk lahebon umbusuhup? An namu wereg lit elehet olol-folol uruk hag toho welahi.

⁵Hiren an lehoma heriyeg lahi ambehen pilap nabul ulug henele sahaltuk lahep. Henele si ane uruk lahebon fahet fano peruk lit henembiliken eneg Allah unuk fam ap hi eneptuk lahep angge famen hinindimuwen huluwap eneptuk lahep.

⁶Allahn eneg let napmisi ulug nindi yuwag toho welahi. Aren eneg windat napmisi ulug yet teg lahi.

⁷At eneg an nubahet helep ubule hag toho wereg, Aren eneg an ili og naptuk. At o yaron uwag ineyon hag toho weregma an nindi yuk turuk laruhu fug.

⁸Aben an nunuk siyahap tuhup tohon ulug Allahn nibil atuk lit windat naptuk. At an nubahet helep yaron hag toho weregma an alma laruk lit nine roho unduhuk lahi.

⁹Hit Allah umalikisi welahebonen likiya hupmu At ubam eneg wenggel haruk lit hit hunundama werehon hiyag utuk lamuhup. Nit At iraham hirag arik laruk lit ninindi yuwag toho welamuhuk.

¹⁰Ap kinangmon arimano enembilik ahe fu roho longgo urukon hag toho wereg. Enembilik ahe se reg angge famen ap ununuk palimuwon oho anggin wirim haruk angge fam wirim turukmen anggin mondabi eleg am teg.

¹¹Nonolok ane turuk lit aben tohon hilaruk lamuhuk angge ariyen fano welamuhuk ulug wenggel haruk lamuhup fug. Hininggikmu anggolo aruhuwon fahet oho hinindi pulmu emberuk lamuhup fug.

¹²Allahn inggik anggoloenam ele urukmu holtuk latikikon tu: Allah eneg ine wereg.

¹³We tem toho Hat Nikni Allahn hinggik kobog isa fug angge humalikisi hindi enesug lahen. Haren ap wal tanehen siyag ane fano ane turukon hikit toho ayeg war isaruk lahen.