Read Angguruk Yali MAZMUR 63 Bible Online

MAZMUR 63 - Angguruk Yali bible

MAZMUR 63

¹Daud ino Yehuda lekma wereg lit sini yunggultuk latfahon tu:

²Allah, an Nikni we Hat eneg welahen. Hat men mangno roho welale ulug nindi ouk toho yami haptuk lahi. Kinang lilog teg ambehen ik welalep ulug wenggel haruk hag toho Hat fahet nindi anggin toho wenggel haruk lahi.

³Hat hebe hine roho mondabi palimu welahenon yet hiyahuken Hat hibamen yami haptuk lahi.

⁴Sat ap unubam werehon apma regma Haren hindi enesug lahen ane mondabi palimu reg ulug Hat wel haptuk lahi.

⁵An noluk wereg lit ninggik leho felug sembahyang fam Hat wel haptuk laruhuk.

⁶Seni ahil toho esetlug enehiyeg toho naruk hag toho Haren an nindi nahiyehap naptuk lahenma nahiyehen yunggultuk lahi.

⁷Nibalma nohoruk lit Hat hubam eneg wenggel haruk lahi. Hup yat toho hubahet ebetuk lit welahi.

⁸Hat haherabul apma wereg lit Allahn windat naptisi ulug nindi roho tei watuk lahi.

⁹Hat hinggiken an sen nasug lahenma an Hat hubam lombog teg lahi.

¹⁰Ap an nuwabul peruk inap fobik ap warehon wereg ambeg wambuhup.

¹¹It arimano tog elman unusuhupmu mene onolokonen naruk lamuhup.

¹²Israel ninap nonowe suwon ino Allahn fet nasug ulug ahiyeg toho welaruhu. Allah unuk fam tem toho ihi ulug sali emberukon arimano inindi se roho welamuhup. Enele si ane uruk inap arimano enembilik lar amuhup.