Read Angguruk Yali MAZMUR 64 Bible Online

MAZMUR 64 - Angguruk Yali bible

MAZMUR 64

¹Dauren sini milaltuk lit yunggultuk latfahon tu:

²Nikni Allah, an nindi anggin toho wereg lit Hat hubam nele uruk lahiyon hol niyimin! Ap seliyonen an nuwabusa ulug nakol haruk lahireg windat nabik ma!

³Nonolok ane ubam tul ulug enele sahaltuk inap arimano onolohotman an hirag nabin. Siyag-siyag ane tul ulug enele ngik-ngog uruk.

⁴Enembilikanggen karog ayeg umahowon hag toho wereg. Tog pising turuk hag toho enele siyahon eneg uruk.

⁵Ap siyag ane turuk elehon enepeleg toho weregman iren hirako tog unubam pising isaruk. Amben siyahon turuk lahe puk fug angge enembong se roho unusuruk.

⁶Ap siyahap enebul ulug inineyap taruk lit, ”Aben olok angge welam fug teg peruk ambeg yebangge yep tul,” ulug enele sahaltuk. ”Yebangge arimano ap misihen oho yet hahu fug,” uruk.

⁷Inindimuwen nonolok ane tul ulug wenggel haruk lit, ”Fuki roho wenggel heheyon ari fano tubul. Nit nunundaman peruk laheyon ap misihen oho oluk am fug teg,” uruk.

⁸Ari uruk angge famen Allahn tog sinat unusuhu.

⁹Iren enele siyag toho urukon fahet Allahn miyaloho hik isahumu kinangma fuk toho ying amuhup. Yinggigmu yet isaruk lit aben unum hilik turuk lamuhup.

¹⁰Ari roho turukmu ap obog tohowen hol halug enekol haruk lit inindimuwen Allahn turukon fahet wenggel haruk lamuhup ane ap winon hiyag isaruk lamuhup.

¹¹Allah ele holtukon arimanowen NINIKNI Allah fano ulug enehiyeg haruk lamuhup. Asengseng toho wereg li At apma laruk lit inindi yuwag toho welamuhup. Inindi pikit toho werehon arimano fano welahe ulug enewelwel taruk lamuhup.