Read Angguruk Yali MAZMUR 65 Bible Online

MAZMUR 65 - Angguruk Yali bible

MAZMUR 65

¹Dauren Allah wel turuk lit sini yunggultuk latfahon tu:

²Ninikni Allah, Hat tom Sion fam welahenon, ap obog tohowen Hat wel habukag. Aben Hat hubam sali emberuk ane hikit toho turuk lamag.

³Aben hubam sembahyang urukon Haren holtuk lahen. Ap obog tohowen siyag ane turukon Hat hambeg walug waharuk.

⁴Siyag ane nunubam werehon niren leg ha fug teg lahe angge famen[9] Haren elehap turuk lahen.

⁵Ap An nibam wamuhupteg niraham welamuhup ulug mumal eneptuk lahenon arimano enehiyeg toho welamuhup! Hat hibam welamuhukmu fano ane eneg nunubam turuk laruhunmu ninindi se roho welamuhuk.

⁶Nit nenele hubam urukmu Haren hol halug ninibil atuk lahen. Haren nit windat nenepmin ulug ap enekol atuk ane eke hag eke hag turuk lahen. Ap ik saho ahik ayegman tulug kinang atogman atogma werehon obog tohowen Allahn eneg fanowap nenebuhu ulug inindi hubam emberuk.

⁷Hat hineyonen tom hutuk tibinag. Hat mondabi hine reg lit

⁸ik haglabut warik waharukon yuwahap turuk lahen. Ap o pumbuk kema-kema werehon enele ya nga urukmu Haren onggon eneptuk lahen.

⁹Haren enehane ap kinangmon obog toho iniline turukmu yet haruk lit Hat fahet enekol haruk. Yali filon hubula filon obog tohowen enehiyehen enele hi roho uruk.

¹⁰Nit nenengginang aru Haren fano roho foroho lit osit pilabik waharuk lahenma kinang filik atlug nungge-nungge yatukon si roho wilip atuk. Ik Hat famen waharukon ik suwon firig atuk elehon weregma roti anggen anggolo roho og nisaruk lahen. Ari obog toho fano teko lawag ulug Haren turuk lahenon tu:

¹¹Yabuk tamuk tegma kinang ineyon lilibug toho lawag ulug Haren osit pilabik waharuk lahenma wiyig atlug yatuk angge fano wilip atuk.

¹²Hat hindi fanowonen mo ilig am wirig am turukmu suburu ebe su roho og nisaruk lahen. Hat walinggoho laruk lahen ambeg arimanowen mun angge man angge anggen fano yihik feruk.

¹³Anggenma inggilangge fanowon eneg weregma punu ke ap enehiyeg toho yunggultuk.

¹⁴Anggenma wam domban keleg urukmu tonggo ke roti anggen eneg wereg. Ap obog toho enehiyeg toho wereg lit sini yunggultuk.